Ǵárezsizliktiń dáslepki jıllarınan baslap elimizde ǵalaba xabar qurallarınıń jámiyetlik turmısta tutqan rolin arttırıw, onıń materiallıq-texnikalıq bazasın bekkemlew, jurnalistlik kásiptiń abıroyın kúsheytiw, taraw xızmetkerleriniń miynetin hár tárepleme xoshametlew baǵdarında keń kólemli jumıslar ámelge asırılmaqta. Hár jılı 27-iyun kúni pútkil elimiz boylap baspasóz hám ǵalaba xabar quralları xızmetkerleri kúni keń túrde belgilenedi. Bayram qarsańında Ózbekistan Jurnalistleri dóretiwshilik awqamı Qaraqalpaqstan Respublikası bóliminiń baslıǵı, Ózbekistan Respublikasına xızmet kórsetken jurnalist Keńesbay Reymov penen ushırasıp, ózimizdi qızıqtırǵan bir qatar sorawlarǵa juwap aldıq.
-Keńesbay Begdullaevich, búgingi kúni ǵalaba xabar quralları xızmetkerleri aldında turǵan tiykarǵı wazıypalar nelerden ibarat?
-Tez pátler menen rawajlanıp baratırǵan házirgi globallasıw dáwirinde, sonıń menen birge jáhánniń ayrım ellerinde júz berip atırǵan qarama-qarsılıqlar hám informaсiyalıq hújimler háwij alǵan bir payıtta ǵalaba xabar qurallarınıń ornı hám áhmiyeti hár qashanǵıdan da artıp barmaqta.
Bunı jaqsı túsingen respublikamızdıń jurnalistleri dáwir menen teń qádem taslaǵan halda, Húrmetli Prezidentimiz Sh.Mirziyoevtıń basshılıǵında elimizdi soсiallıq-ekonomikalıq jaqtan rawajlandırıw, xalqımızdıń abadan turmısın támiyinlew baǵdarında ámelge asırılıp atırǵan keń kólemdegi reformalardıń mazmun-mánisin, onıń áhmiyetin keń jámiyetshilikke óz waqtında jetkeriw, xalqımızdıń ruwxıy dúnyasın bayıtıw jolında ayanbay miynet etip kelmekte.
2017-jıldıń «Xalıq penen pikirlesiw hám insan mápleri jılı» dep járiyalanıwı, sonıń menen birge, 2017-2021-jılllarda Ózbekistan Respublikasın rawajlandırıwdıń bes tiykarǵı baǵdarı boyınsha Háreketler strategiyasın ámelge asırıwǵa baylanıslı mámleketlik baǵdarlamanıń qabıl etiliwi taraw xızmetkerleriniń aldına jańadan-jańa waıypalar hám maqsetler qoymaqta. Atap aytqanda, jurnalistlerimizdiń turmısımızdıń barlıq salalarına elede tereń kirip barıwı, jámiyetimizde júz berip atırǵan hár qanday waqıyalardı keńirek ashıp beriwi, puqaralarımızdı oylandırıp júrgen, olardıń kúndelikli turmısında ushırasıp atırǵan mashqalalardı alıp shıǵıwda olardan ele de pidayılıq, dóretiwshilik qatnas hám belsendilik talap etilmekte.
Ózbekistan Jurnalistleri dóretiwshilik awqamınıń ótken jıldıń dekabr ayında bolıp ótken gezeksiz konferenсiyasında taraw xızmetkerleriniń kásiplik mamanlıǵın arttırıw, dóretiwshilerdiń miynetin múnásip xoshametlew baǵdarında islenip atırǵan keń kólemli jumıslar menen bir qatarda keleshekte ámelge asırılıwı tiyis bolǵan áhmiyetli wazıypalar belgilep alındı. Ilajda awqamnıń Ustavına ayırım ózgerisler kirgizilip, aǵzalıqqa qabıl etiw máselesi dodalandı.
-Ózbekistan Jurnalistleri dóretiwshilik awqamı tárepinen mápdar shólkemler menen birgelikte ótkerilip kiyatırǵan respublikalıq tańlawlardıń abıroyı jıl sayın artıp barmaqta. Bul ilajlarǵa jurnalistlerimizdiń qatnasın qalay bahalaysız?
-Hár jılı respublikamızdıń ǵalaba xabar quralları Ózbekistan Respublikası Oliy Majlisi janındaǵı Mámleketlik emes kommerсiyalıq emes shólkemlerdi hám puqaralıq jámiyetiniń basqa da institutların qollap-quwatlaw jámiyetlik qorı tárepinen ótkerip kiyatırǵan grant-tańlawlarına belsene qatnasıp, jeńimpazlar qatarınan orın alıp kelmekte. Ótken dáwirde «TTV-Tórtkúl», Ellikqala jergilikli televidenieleri, «Nukus FM» radiosı, «www.amunews.uz» veb-saytı redakсiyası, «Taraqqiyot kwzgusi», «Qaraqalpaq ádebiyatı», «Mening oilam», «Aqmanǵıt tańı», «Kegeyli turmısı», «Ǵáziyne», «Taxtakópir tańı», «Jetkinshek», «Gúlayım», «Nókis pedinstitutı», «Nókis haqıyqatı», «Shımbay hawazı», «Qaraqalpaqstan jasları», «Qaraqalpaq ádebiyatı», «Mádeniyat hám sport» gazetalarınıń redakсiyaları jeńimpaz bolǵan bolsa, bıyılǵı jılǵı tańlawda «Qaraqalpaqstan hawazı» gazetası redakсiyasınıń «Bunı bárshemiz biliwimiz kerek!», «Qarlıǵash» balalar ádebiy jurnalı redakсiyasınıń «Jas dóretiwshi-kitapqumarlar!», «Ámiwdárya» jurnalı redakсiyasınıń «Kitaplar doslarım meniń» temasındaǵı joybarları jeńimpaz dep tabıldı.
Respublikamızda ámelge asırılıp atırǵan úlken dóretiwshilik jumıslardı keń hám analizli járiyalaǵanı ushın «Nukus FM» radiosınıń redaktorı Ulboǵan Erimbetova bıyılǵı jılı «Altın qálem» milliy sıylıǵı ushın xalıqaralıq tańlawda úshinshi orındı, kásiplik bayram múnásibeti menen dástúriy tárizde ótkerilip kiyatırǵan «Jıldıń eń belsendi jurnalisti» tańlawında «Erkin Qaraqalpaqstan» gazetasınıń bólim baslıǵı Nesibeli Mámbetirzaeva, Qaraqalpaqstan televideniesiniń redaktorı Paraxat Sultamuratov, elimiz ǵárezsizliginiń jigirma bes jıllıǵına baǵıshlanǵan «Eń ullı, eń áziz» dástúriy tańlawında jazıwshı Allanazar Ábdiev penen Gúlmira Palwanova, Ózbekistan biyǵárez baspasóz hám málimleme agentliklerin qollap-quwatlaw hám rawajlandırıw jámiyetlik qorı tárepinen ótkerilgen «Jámiyet hám men» tańlawında «Mádeniyat» gazetasınıń redaktorı Gúlmira Palwanova jeńimpaz boldı.
Puqaralıq jámiyeti qáliplesiwin monitoring etiwshi biyǵárez institutı Qaraqalpaqstan Respublikası aymaqlıq bólimi menen birgelikte jurnalistlerdiń bilimin jetilistiriw, olardıń kásiplik sheberligin arttırıw, qabıl etilgen Mámleketlik baǵdarlamalardıń orınlanıwın támiyinlewde taraw xızmetkerleriniń wazıypaları, jurnalist qánigelerin tayarlawdıń búgingi jaǵdayı, óz-ara tájiriybe almasıwdı jolǵa qoyıw, zamanagóy texnologiyalardan keńnen paydalanıwdıń abzallıqları hám basqa da áhmiyetli temalarda seminarlar, dógerek sáwbetleri turaqlı ótkerilip kelinbekte. Internet jurnalistikasın rawajlandırıw, aldıńǵı málimleme texnologiyalarınan keńnen paydalanıwǵa ayrıqsha itibar qaratılmaqta.
Ótken jıldıń 13-15-dekabr kúnleri Ózbekistan Jurnalistleri dóretiwshilik awqamı Ferǵana wálayatı bóliminiń bir topar jurnalistleri óz-ara tájiriybe almasıw hám Aralboyı regionındaǵı sońǵı jılları ámelge asırılǵan unamlı ózgerisler menen jaqınnan tanısıw maqsetinde respublikamız boldı. Miymanlar Berdaq atındaǵı Qaraqalpaq mámleketlik universitetinde, I.V.Saviсkiy atındaǵı kórkem-óner muzeyinde, Ústirt gaz-ximiya kompleksinde, Ellikqala rayonında, «Erkin Qaraqalpaqstan»-«Vesti Karakalpakstana» gazetalarınıń redakсiyalarında, Qaraqalpaqstan teleorayında bolıp, jurnalistler menen óz-ara tájiriybe almastı. Jaqın kúnlerde respublikamız jurnalistleriniń Ferǵana wálayatına saparı rejelestirilmekte.
Ayrıqsha atap ótiw kerek, Qaraqalpaqstan xabar agentligi menen birgelikte usı jıldıń may ayında Ózbekistandaǵı oraylıq hám jergilikli ǵalaba xabar quralları wákilleri ushın mediasayaxat shólkemlestirildi. Bul Prezidentimizdiń usı jıl 18-yanvardaǵı «2017 2021-jıllar aralıǵında Araboyı regionın rawajlandırıw boyınsha Mámleketlik baǵdarlama haqqında»ǵı qararında belgilengen ekoturizmdi rawajlandırıw baǵdarındaǵı dáslepki qádem boldı.
-Kásiplik bayram múnásibeti menen qanday ilajlar ótkeriw názerde tutılmaqta?
-Qaraqalpaqstan Respublikası Joqarǵı Keńesiniń Soсiallıq rawajlanıw hám jámiyetlik birlespeler máseleleri komiteti májilis protokolı menen bayram aldınan ótkeriletuǵın ilajlar tastıyıqlandı. Bıyılǵı jılı bayramnıń Múbárek Ramazan ayı kúnlerine tuwra keliwine baylanıslı tarawda kóp jıl jemisli miynet etken marxumlarǵa húrmet kórsetiledi. Olardıń qábirlerine zıyarat etilip, átirapları abadanlastırıladı. Nókis qalası hákimligi menen birgelikte «Qalamızdı abat eteyik!» súreni menen ekologiyalıq akсiya ótkerildi. Paytaxtımızdıń payızlı orınlarınıń birinde taraw nuranıyları ushın ushırasıw ótkeriw belgilengen. Kúni keshe bayram múnásibeti menen azıq-awqat ónimleri hám xojalıq tutınıw buyımlarınıń yarmarkası shólkemlestirildi. Bunnan tısqarı, respublikamızdıń dıqqatqa ılayıq orınlarına sayaxatlar shólkemlestiriw názerde tutılmaqta. Tiykarǵı bayram saltanatı Qaraqalpaq mámleketlik Quwırshaq teatrında ótkerilip, respublikamız kórkem óner ǵayratkerleri hám jas talant iyeleriniń konсert baǵdarlaması qoyıp beriledi.
-Kásipleslerimizge bayram tileklerińiz…
-Respublikamızdıń gúllán baspasóz hám ǵalaba xabar quralları xızmetkerlerin, mashaqatlı kásipte uzaq jıllar jemisli miynet etken, búgingi kúni húrmetli dem alıstaǵı veteranlarımızdı jaqınlasıp qalǵan kásiplik bayramı menen qutlıqlayman. Shańaraqlarına amanlıq, ózlerine bekkem densawlıq, dóretiwshilik jumıslarında tasqın tabıslar tileymen.

Sáwbetlesken: D.ABIBULLAEV,
Qaraqalpaqstan xabar agentliginiń xabarshısı.