Ózbekistan Respublikası Ministrler Kabinetiniń usı jıl 7-iyun kúngi «Haj» hám «Umra» ilajların shólkemlestiriw hám ótkeriwdi jáne de jetilistiriw ilajları haqqında»ǵı qararı tiykarında bıyıl haj saparına baratuǵınlardıń sanı artatuǵın boldı.
Dinimizdiń áhmiyetli shártlerinen biri – múbárek Haj saparın ámelge asırıw ushın baratuǵınlardıń dizimi ózin-ózi basqarıw uyımları tárepinen usınılıp, olar ruwxıy, narkologiyalıq, teri-venerikalıq, tuberkulyoz kesellikleri boyınsha tekseriwden ótedi.
Usı qararǵa baylanıslı Ózbekistan kóleminde bıyılǵı jılı Haj saparınıń kvotası 7 mıń 200 ge, 2018-jıldan baslap hár jılǵı «Umra» saparınıń kvotası 6 mıńnan 10 mıńǵa arttırıladı.
Sentyabr ayınıń baslarında respublikamızdan 150 den aslam jerlesimiz múbárek haj zıyaratın ámelge asırıw ushın Saud Arabstanına ketedi. Al, Umra zıyaratı báhár máwsiminde ámelge asırıladı. Esletip ótemiz, aldıńǵı jılları Haj zıyaratın ámelge asırıwshı jerleslerimizdiń sanı 100 puqaradan aspaytuǵın edi.
Búgingi kúnde olardıń zıyarattı tolıq ámelge asırıwı ushın barlıq sharayatlar jaratılmaqta. Hajılarǵa turaq jay, mediсinalıq xızmet kórsetiw boyınsha zárúrli ilajlar ámelge asırılmaqta.

M.PIRNAZAROVA,
Qaraqalpaqstan xabar agentliginiń xabarshısı.