Prezident Shavkat Mirziyoev 10-dekabr kúni Tashkent wálayatında qosımsha imkaniyatlardı iske qosıw, jumıs ornı hám investiciyanı kóbeytiw máseleleri boyınsha májilis ótkerdi.
Tashkent wálayatında sanaat, awıl xojalıǵı, xızmetler, turizm, ulıwma, barlıq tarawlarda júdá úlken imkaniyatlar bar. Sońǵı jeti jılda aymaq ekonomikası 1,5 esege ósken. Sanaat kárxanaları 2 esege kóbeyip, 12 mıńǵa jetken.
Biraq imkaniyatlar bunnan da kóp, olar tolıq iske qosılmay atır. Mısalı, wálayattaǵı jámi jerlerdiń tek ǵana 25 procentinen awıl xojalıǵında paydalanıladı. Hár gektarǵa tuwra keletuǵın dáramat ta basqa orınlarǵa qaraǵanda az. Bekabad hám Ahangaran qalaları, Aqqorǵan, Chinaz, Piskent rayonlarında qayta islew dárejesi júdá tómen. Azıq-awqat qáwipsizligi, miywe-ovoshlar eksportı da imkaniyatqa jarasa emes.
Sın kózqaras ruwxında ótken májiliste jerden paydalanıw nátiyjeliligin arttırıw ilajları belgilendi. Oǵan bola, hár bir klaster, fermer hám diyqan xojalıǵı maydanındaǵı eginler, ónimler kólemi, jumısshılar sanı, salıq túsimi sıyaqlı ónimler «Agroplatorma» málimleme sistemasına kirgiziledi. Kelesi jılı miywe-ovosh jetistiriwge qánigelesken 7 rayonda 52 mıń gektarda 3 ret ónim alıw jolǵa qoyıladı. 5 mıń gektarda sanaatlasqan baǵ hám júzimgershilikler shólkemlestiriledi.
Ulıwma, 22 rayon-qaladaǵı jerler qayta islewshi hám eksportshı kárxanaǵa baylanısadı. Bul arqalı kelesi jılı 3,5 million tonna miywe-ovosh jetistirip, 500 million dollar eksport etiw múmkin ekenligi aytıldı.
Tashkent wálayatınıń infrastrukturası, logistikası isbilermenlik ushın júdá qolaylı. Biraq óndiris, sawda hám xızmetlerdiń ulıwma maydanı úsh jılda tek ǵana 1,6 million kvadrat metrge artqan, bul paytaxttan 3,5 esege az. Investiciyalıq joybarlar ushın kategoriyası ózgertilgen 9 mıń gektar jerdiń 2 mıń gektarınan paydalanılmay atır. Bos turǵan mámleketlik imaratlar da bar.
Investorlar bul aymaqta «aqıllı qala», medicina klasteri, jasıl energetika stanciyasın qurıw baslamasın bildirgen. Oypatlı hám paytaxtlı mıńlaǵan isbilermenler de biznesin keńeytiw, jańa kárxana, miymanxana, sawda hám turizm komplekslerin qurıw ushın orın izlep júripti.
Mámleketlik aktivlerdi basqarıw agentligi hám wálayat juwapkerlerine bul baǵdardaǵı artta qalıwshılıqlar kórsetip ótildi. Imarat hám jerlerdi isbilermenlerge qolaylı shártte aukcionǵa shıǵarıw, olardıń negizinde investiciya, jumıs ornı hám eksporttı kóbeytiw boyınsha tapsırmalar berildi.
Tashkent wálayatı hákimi kelesi jılı 5 milliard dollar investiciya tartıw hám eksporttı 2 milliard dollarǵa jetkeriw boyınsha rejelerin tanıstırdı. Mámleketimiz basshısı onıń quramına itibar qaratıp, kútilip atırǵan investiciyanıń yarımı rawajlanıp atırǵan Almalıq, Angren, Shırshıq qalaları, Ahangaran, Zangiata hám Qibray rayonlarına tuwra keletuǵının atap ótti. Sol sebepli sanaat hám xızmetler tómen bolǵan Aqqorǵan, Bekabad, Bwka, Parkent, Piskent, Tómengi Shırshıq hám Chinazda qosımsha joybarlar islep, jumıs orınların ashıw kerek ekenligi atap ótildi.
Tashkent wálayatındaǵı imkaniyatlar esabınan barlıq xalıqtı dáramatlı etiw múmkin ekenligi aytıldı. Kelesi jılı wálayatta 700 mıń adamnıń bántligin támiyinlep, jumıssızlıqtı tábiyǵıy dárejesine shekem túsiriw, 22 mıń shańaraqtı dáramatlı etip, kámbaǵallıqtı házirgi 7,2 procentten 4 procentke azaytıw, miynet migrantların elimizge qaytarıp, jumısqa orınlastırıw wazıypa etip alındı.
Prezidentimiz májiliste qatnasqan wálayat isbilermenleri menen de sóylesti. Olardıń usınıs hám baslamalarına ayrıqsha itibar qaratıp, usı baǵdarda juwapkerlerge tiyisli kórsetpeler berdi.
ÓzA