Oliy Majlis Nızamshılıq palatasınıń májilisinde jollarda háreketleniw qáwipsizligin támiyinlewge qaratılǵan nızam joybarı dodalandı.
– Mámleketimizde jollardı háreket qáwipsizligin támiyinlew, háreket qatnasıwshıları ushın qolaylı hám qáwipsiz sharayatlardı jaratıw boyınsha keń kólemli jumıslar ámelge asırılmaqta,-dedi ishki isler ministriniń orınbasarı Ramazon Ashrapov. – Biraq ayırım aydawshılar tárepinen jasıl aymaqlar, piyadalar hám velosiped jollarınan júriw jaǵdayları júz bermekte. Bunday huqıqbuzarlıqlar boyınsha xalıqaralıq tájiriybede hákimshilik juwapkershilikler belgilengen. Sonnan kelip shıǵıp, bul nızam joybarında transport quralların trotuarlardan, velosiped jollarınan, jasıl aymaq maydanlarınan júrgiziwdiń aldın alıwǵa qaratılǵan normalar belgilenbekte.
Sonday-aq, xalıq tárepinen nızamsız túrde joldıń qatnaw bólegine tosqınlıqlar ornatıw yamasa jollardı tosıp qoyıw, transport quralları hám puqaralardıń háreketine tosqınlıq etiw jaǵdaylarına shek qoyıw ushın juwapkershilik ilajları názerde tutılmaqta. Bunday jaǵdaylar boyınsha da xalıqaralıq tájiriybe úyrenilgende, kóplegen mámleketlerde juwapkershilik máseleleriniń názerde tutılǵanınıń gúwası boldıq.
Nızam joybarınıń qabıl etiliwi jollarda háreket qatnasıwshılarınıń qáwipsizligin támiyinlew, olardıń erkin háreketleniwine sharayat jaratıw, aydawshılardıń juwapkershiligin arttırıw hám hár qıylı jol háreketine baylanıslı avariyalardıń aldın alıwǵa xızmet etedi.
Májiliste nızam joybarı boyınsha deputatlar ayırım sorawlardı ortaǵa tasladı hám juwapkerler tiyisli juwaplar berdi. Bunnan soń joybar birinshi oqıwda qabıl etildi.

Muhtarama Komilova,
ÓzA