2027-jıl 1-sentyabrge shekem «Ózbekzergersanaatı» associaciasına aǵza bolǵan zergerlik buyımların islep shıǵarıwshı isbilermenler múlk hám jer salıǵınan azat etiliwi múmkin.
Sonday-aq, sırt elde islep shıǵarılǵan bahalı metallardan hám bahalı taslardan islengen zergerlik hám basqa buyımlardı bajxana tólemleri tólengenin tastıyıqlawshı hújjetlersiz satıwǵa qoyıw hám usaqlap satıwda realizaciyalawǵa shek qoyılıwı kútilmekte.
Bul haqqında Oliy Majlis Nızamshılıq palatasınıń májilisinde kórip shıǵılǵan zergerlik sanaatın jáne de rawajlandırıwǵa qaratılǵan nızam joybarın dodalaw dawamında aytıp ótildi.
Atap ótilgenindey, nızam joybarında ayırım nızam hújjetlerine zergerlik buyımların islep shıǵarıwshılardıń bahalı metallarǵa bolǵan talabın qanaatlandırıw, olardıń rawajlanıwı ushın qolaylı biznes ortalıǵın jaratıw hám nızamshılıqta bolǵan byurokratiyalıq tosqınlıqlardı liberallastırıwǵa qaratılǵan bir qatar ózgeris hám qosımshalar kirgiziw usınıs etilmekte.
Atap aytqanda, affinaj kárxanalarına (quramında bahalı metall hám taslar bolǵan shiyki zat penen islesiw jumısın licenziya tiykarında ámelge asırıwshı kárxanalar) bahalı metallardı zergerlik buyımların islep shıǵarıwshılar ushın qolaylı túr hám muǵdarlarǵa keltirgen halda satıw bahalı metallardan suvenir teńgeler tayarlaw hám realizaciyalaw huqıqın beriw názerde tutılmaqta.
Sonday-aq, zergerlik buyımların islep shıǵarıwshılarǵa da ózleri jasaǵan zergerlik buyımlarınıń shiyki ónimlerin basqa islep shıǵarıwshılarǵa realizaciyalaw huqıqı berilmekte. Bunnan tısqarı, yuridikalıq hám fizikalıq táreplerden bahalı metallardı hám zergerlik buyımların satıp alıw isleri wákillik uyımdı xabardar etiw tártibinde ámelge asırılıwı belgilenbekte.
ÓzA