Oliy Majlis Nızamshılıq palatasınıń májilisinde «Ózbekstan Respublikasınıń ayırım nızam hújjetlerine aqsha talapnamasınan basqa shaxstıń paydasına waz keshiw esabınan qarjılandırıw (faktoring) qatnasıqların rawajlandırıwǵa qaratılǵan ózgerisler hám qosımshalar kirgiziw haqqında»ǵı nızam joybarı dodalandı.
Atap ótilgenindey, házirgi kúnde aqsha talapnamasınan basqa shaxstıń paydasına waz keshiw esabınan qarjılandırıw (faktoring) operaciyaların tártipke salıwshı tiykarǵı normalar faktoring qatnasıqların ámelge asırıw hám tártipke salıw boyınsha usı tarawdıń rawajlanıwına tosqınlıq etpekte. Bul bolsa óz gezeginde, mámleket qarjı bazarında tek ǵana faktoring jumısı menen shuǵıllanıwshı óz aldına qarjı institutınıń joq ekenligi isbilermenler hám investorlar tárepinen faktoring bazarına investiciya kirgizilmey atırǵanına sebep bolmaqta.
Usı múnásibet penen, Ózbekstanda faktoring qatnasıqların rawajlandırıw maqsetinde nızam hújjetleri, atap aytqanda, Puqaralıq kodeksine hám basqa nızam hújjetlerine xalıqaralıq tájiriybeden kelip shıǵıp bir qatar ózgerisler hám qosımshalar kirgiziw názerde tutılmaqta.
Nızam joybarınıń qabıl etiliwi Ózbekstanda faktoring qatnasıqların tártipke salıwshı nızamshılıq hújjetleriniń normaları xalıqaralıq tájiriybege muwapıqlastırılıp, faktoring xızmetlerinen paydalanıw imkaniyatlarınıń keńeytiliwine xızmet etedi.
M.Komilova, ÓzA