Búgin Tailandta eresekler arasında boks boyınsha ótkerilip atırǵan Aziya chempionatınıń final bellesiwleri bolıp ótpekte.
13 salmaq kategoriyası boyınsha ótkerilip atırǵan bul jarısta Ózbekstan saylandı komandası aǵzaları da tabıslı qatnaspaqta. Atap aytqanda, 10 salmaq kategoriyası boyınsha final bellesiwlerine qatnasıp atırǵan boksshilerimizden -48 kg salmaqta Shodiyorjon Meliqwziev qazaqstanlı Sanjar Tashkenbayǵa qarsı ringke shıǵıp, onı
4:1 esabında jeńip shıǵıwǵa eristi hám mámleketimiz saylandı komandası esabına dáslepki medaldı alıp berdi.
Bunnan soń -51 kg salmaqta qatnasqan boksshimiz Asilbek Jalilov altın medal ushın filippinli Marvin Tabamo menen bellesiwge túsip, onı 5:0 esabında jeńip shıǵıwǵa eristi hám Aziya chempionı ataǵına miyasar boldı.
-54 kg salmaqta bellesiwge túsken Shahzod Muzaffarov bolsa, finalda qazaqstanlı Mahmud Sabırxanǵa qarsı ringke shıǵıp, oǵan 1:4 esabında jeńilip qaldı.
-57 kg salmaqtaǵı boksshimiz Mirazizbek Mirzaxalilov finalda jáne bir qazaqstanlı Orazbek Assikulovga qarsı bellesiwge túsip, onı 5:0 esabında jeńip shıǵıp, saylandı komandamızǵa jáne bir altın medaldı alıp keldi.
-63,5 kg salmaqta jarısqa qatnasıp atırǵan Adhamjon Muhiddinov altın medal ushın tailandlı Somchay Volngsuvan menen ushırastı hám bul bellesiw tailandlı boksshiniń qabaǵı jırtılıp ketkenligi sebepli, chempionlıq ózbekstanlı boksshige tapsırıldı. Sonday-aq, -67 kg da Mujibillo Tursunov, 71 kg da Havasbek Asadullaev, -75 kg da Javohir Ummataliev, -80 kg da Twrabek Habibullaevlar óz qarsılasların jeńilip, Aziya chempionı bolıwǵa eristi.
Tilekke qarsı -86 kg salmaqta finalǵa shekem jetip kelgen Jasurbek Ywldoshev qazaqstanlı Bekzad Nurdáwletovqa 1:4 esabında jeńilip, chempionattıń gúmis medalı menen shekleniwge májbúr boldı.
Solay etip, saylandı komandamız boksshileri final bellesiwlerinde 8 altın, 2 gúmis hám 1 qola medal menen ulıwma komandalıq esapta birinshi orındı iyelewge miyasar boldı.
4 altın medalǵa iye Qazaqstan ekinshi, 1 altın medaldı iyelegen tájikstanlı boksshiler úshinshi orındı iyelewge eristi.
Adilbay Orazov,
Qaraqalpaqstan xabar agentligi sholıwshısı