Búgin respublikamızdıń barlıq joqarı oqıw orınlarında «Qaraqalpaqstan Respublikası Konstituciyasınıń jigirma bes jıllıǵı» atamasında ushırasıwlar bolıp ótti.
Oǵan Qaraqalpaqstan Respublikası Joqarǵı Keńesiniń komitet baslıqları, sud, prokuratura, ishki isler uyımlarınıń basshıları, joqarı bilimlendiriw mákemeleriniń professor-oqıtıwshıları, qánigeleri, student-jaslar qatnastı.
Berdaq atındaǵı Qaraqalpaq mámleketlik universitetinde ótkerilgen ushırasıwda Qaraqalpaqstan Respublikası Joqarǵı Keńesiniń komitet baslıǵı D.Qurbaniyazov, Ádillik ministrliginiń bólim baslıǵı Á.Ótewliev, Nókis rayonlararalıq ekonomikalıq sudınıń baslıǵı B.Ubaydullaev hám basqalar shıǵıp sóylep, jıynalǵanlardı bayram menen qızǵın qutlıqladı.
Ilajda ózinde insanıylıq ideyalardı jámlegen, insan huqıqların hám hújdan erkinligin támiyinlewshi bul nızam hám onıń áhmiyeti tuwralı keńnen túsinik berildi. Atap ótilgenindey, mine usı Konstituciya 25 jıldan berli respublikamızda jámiyettiń dáwir talabına sáykes rawajlanıw procesine unamlı tásir tiygizetuǵın, onı retlestiretuǵın hám tártipke salatuǵın yuridikalıq hújjet bolıp kelmekte. Konstituciyamız búgingi jedel pát penen ózgerip atırǵan dúnyadaǵı processlerdiń barlıq sınaqlarınan tabıslı ótip kelmekte.
Bayramǵa baǵıshlanǵan ilajlar dawam etpekte.
Á.Jiemuratov,
Qaraqalpaqstan xabar agentliginiń xabarshısı.
(B.Ibragimovtıń túsirgen súwretleri).