Ózbekstan Respublikası Oliy Majlisi Senatında 17-aprel kúni Latviya Respublikası Seymi Baslıǵı Inara Murniece basshılıǵındaǵı usı el parlamenti delegaciyası menen ushırasıw bolıp ótti.
Sóylesiw waqtında Senat Baslıǵı N.Ywldoshev Ózbekstan Respublikası Oliy Majlisi hám Latviya Respublikası Seymi arasındaǵı qatnasıqlar izbe-iz rawajlanıp atırǵanın atap ótti.
2010-jılı Latviya Seyminde Ózbekstan Respublikası Oliy Majlisi menen birge islesiw boyınsha topar dúzilgen bolsa, 2012-jıl iyulde elimiz parlamentinde áne usınday doslıq toparı dúzildi. Sol jılı sentyabrde Oliy Majlis hám Seymniń parlamentleraralıq doslıq toparları arasında birge islesiw haqqındaǵı memorandumǵa qol qoyıldı.
Ótken jılı may ayında Oliy Majlis Senatınıń Baslıǵı N.Ywldoshevtıń basshılıǵındaǵı Ózbekstan parlamenti delegaciyasınıń Latviyaǵa saparı, usı sapar etiw sheńberinde ótkerilgen bir qatar ushırasıwlar birge islesiwdi bunnan bılay da keńeytiwde hám jańa basqıshqa kóteriwde úlken áhmiyetke iye.
Sapar etiw kúnleri Riga qalasında sawda-ekonomikalıq hám investiciyalıq birge islesiw boyınsha Ózbekstan-Latviya biznes seminarı ótkerilip, onda eki el isbilermen toparlarınıń 300 den aslam wákili qatnastı. Bir qatar vedomstvolar menen mákemeler arasında birge islesiwge baylanıslı memorandumlarǵa qol qoyılıp, kelisimlerge erisildi.
Latviya Respublikası Seymi Baslıǵı Inara Murniece basshılıǵındaǵı delegaciyanıń elimizge bul sapar etiwi parlamentleraralıq birge islesiw kólemin bunnan bılay da keńeytiwge xızmet etedi.
Ushırasıwda tárepler ellerimiz parlamentleri arasındaǵı birge islesiwdiń búgingi jaǵdayın hám perspektivaların dodaladı. Demokratiyalıq hám sociallıq-ekonomikalıq reformalardı ámelge asırıw boyınsha toplanǵan tájiriybe talqılandı. Parlamentler arasındaǵı sóylesiwdi mazmun jaǵınan ele de bayıtıw ushın barlıq imkaniyatlardı iske salıw maqsetke muwapıqlıǵı atap ótildi.
Oliy Majlistiń Nızamshılıq palatasında ótkerilgen ushırasıwda Spiker N.Ismoilov Ózbekstan menen Latviya arasındaǵı óz-ara isenim hám mápdarlıqqa tiykarlanǵan qatnasıqlar parlamentarizm tarawında da izbe-iz rawajlanıp atırǵanın atap ótti.
Ellerimizdi bekkem doslıq qatnasıqları baylanıstırıp turatuǵını, nızam dóretiwshiligi tarawındaǵı baylanıslardıń jedelleskeni teń huqıqlılıqqa tiykarlanǵan sheriklik qatnasıqlarınıń jáne bir kórinisi ekeni atap ótildi.
Sóylesiwde eki el arasındaǵı sırtqı siyasiy hám sırtqı ekonomikalıq birge islesiwdiń normativlik-huqıqıy bazasın jetilistiriwge baylanıslı máseleler kórip shıǵıldı. Shólkemlesken jınayatshılıq, terrorizm narkotik hám psixotrop zatlardıń nızamsız aylanısına qarsı gúresiw boyınsha dúzilgen Ózbekstan-Latviya birge islesiw komissiyasınıń alıp barıp atırǵan jumısları boyınsha pikir alısıldı.
Ushırasıwda miymanlarǵa elimizde ámelge asırılıp atırǵan keń kólemli reformalar, Oliy Majlistiń Nızamshılıq palatası jumısı haqqında maǵlıwmat berildi.
Latviya parlamenti delegaciyası, sonday-aq, elimizdiń bir qatar ministrlikleri hám vedomstvolarında da sóylesiwler ótkerdi.
ÓzA