Usı jıldıń 6-aprel kúni Ózbekstan Respublikası Ministrler Kabinetiniń «Milliy mádeniyatımızdıń rawajlanıwına úlken úles qosqan kórkem óner ǵayratkerlerin hám ózbek kórkem ónerin dúnya saxnalarında kórsetip kiyatırǵan jaslardı qollap-quwatlaw ilajları haqqında»ǵı qarar qabıl etildi. Bul haqqında Ádillik ministrliginiń «Huquqiy axborot» kanalı xabar bermekte.

Usı qararǵa muwapıq, milliy mádeniyatımızdıń rawajlanıwına úlken úles qosqan kórkem óner ǵayratkerlerin hám ózbek kórkem ónerin dúnya saxnalarında kórsetip kiyatırǵan jaslardı Ózbekstan Respublikası Prezidenti atınan xoshametlew tártibi haqqında Ustav qabıl etildi.

Ustavqa muwapıq:

– Milliy mádeniyatımızdıń rawajlanıwına úlken úles qosqan kórkem óner ǵayratkerlerin hám ózbek kórkem ónerin dúnya saxnalarında kórsetip kiyatırǵan jaslar eń kem miynet haqınıń 50 esesi muǵdarında bir mártelik aqshalay sıylıq penen materiallıq jaqtan xoshametlenedi hám olarǵa sıylıqlanǵanlıǵı haqqındaǵı sertifikat tapsırıladı;

– Sıylıqlawǵa, qaǵıydı tárizinde, tómendegi tarawlarda xızmet etip atırǵan mádeniyat tarawı wákilleri usınıs etiledi:

– kompozitor, kórkem óner izertlewshileri;

– teatr, kino hám ǵalabalıq ilajlar aktyorları, rejissyorları;

– dirijyorlar, baletmeysterler;

– muzıka, xor, ayaq oyın, cirk, orkestr, ansambl atqarıwshıları hám usı jámáátlerdiń kórkemlik jaqtan basshıları;

– dástan atqarıwshıları;

– shayır hám jazıwshılar;

– muzeyhám materiallıq jáne materiallıq emes mádeniy miyras obektlerin qorǵaw tarawında jumıs islep atırǵan xızmetkerler;

– súwretlew hám ámeliy óner wákilleri, dizaynerler.

Sıylıqlawǵa mádeniyat tarawınıń basqa baǵdarlarında jumıs alıp barıp atırǵan talabanlar da usınıs etiliwi múmkin.

Talabanlardı usınıs etiw hám jeńimpazlardı anıqlaw aymaqlıq komissiyalar hám respublikalıq komissiya tárepinen ámelge asırıladı.

Sıylıqlaw saltanatı hár jılı Tashkent qalasında Ǵárezsizlik bayramı qarsańında ótkeriledi.

Qaraqalpaqstan xabar agentligi