Ózbekstan Respublikası Málimleme texnologiyaların hám kommunikaciyaların rawajlandırıw ministrliginde Awǵanstan kommunikaciya hám málimleme texnologiyaları ministri Shahzod Gul Aryobi basshılıǵındaǵı delegaciya menen ushırasıw bolıp ótti.
Onda telekommunikaciya hám málimleme texnologiyaları tarawındaǵı eki tárepleme birge islesiwdi keńeytiw, sonıń ishinde, joqarı tezliktegi tranzit baylanıs kanalların jolǵa qoyıw, eki eldiń tarmaq operatorları arasındaǵı xalıqaralıq telefon trafik sıyımlılıǵın kóbeytiw, Internet tarmaǵına jedel jalǵanıwdı shólkemlestiriw, MKT tarawında kadrlar tayarlaw sıyaqlı jańa baǵdarlarda joybarlardı ámelge asırıw máseleleri dodalandı. Atap ótilgenindey, bul joybarlar tek ǵana baylanıs tarawında ǵana emes, al basqa baǵdarlarda da qatnasıqlardıń keńeyiwine xızmet etedi.
Sóylesiwlerdiń logikalıq dawamı sıpatında eki el arasında málimleme-kommunikaciya texnologiyaların rawajlandırıw baǵdarında birge islesiwdi bekkemlewge qaratılǵan Strategiyalıq birge islesiw boyınsha túsinisiw memorandumına qol qoyıldı.
Bul hújjetten gózlengen maqset telekommunikaciya, málimleme texnologiyaları hám pochta xızmetlerin kórsetiwde tájiriybe almasıw jáne óz-ara baylanıslardı keńeytiwden ibarat. Memorandumda MKT tarawında texnikalıq járdem kórsetiw máselesi de názerde tutılǵan.
Túsinisiw memorandumı tiykarında tárepler birge islesiwge baylanıslı normativlik-huqıqıy bazanı jetilistiredi, óz-ara baylanıslı bolǵan telekommunikaciya hám baylanıs tarmaqları jáne pochta baylanısı infrastrukturasın optimallastırıw ilajların kóredi. Atap aytqanda, Oraylıq Aziyaǵa Ózbekstan arqalı ótetuǵın pochta tranziti jumısı támiyinlenedi.
Ushırasıwda tárepler MKT tarawınıń túrli baǵdarlarında básekige shıdamlılıqtı arttırıwǵa, «Elektron húkimet» baǵdarında birge islesiwge kelisip aldı.
– Awǵanstan Prezidentiniń elimizge saparı waqtında MKT tarawında birge islesiwdi rawajlandırıw boyınsha da kelisimge erisilgen edi. Bul kelisim tiykarında Awǵanstan MKT ministri basshılıǵındaǵı delegaciya menen tarawdıń túrli baǵdarlarında tıǵız birge islesiwdi jolǵa qoyıw, birinshi gezekte Awǵanstan boyınsha «Jol kartası»nda belgilengen wazıypalardı júzege shıǵarıw, Internet tranzitin arttırıw máseleleri kórip shıǵıldı, – deydi Ózbekstan málimleme texnologiyaların hám kommunikaciyaların rawajlandırıw ministri A.Ahmadxwjaev. – Awǵanstan tárepi óz qánigeleriniń Ózbekstanda bilim hám tájiriybe arttırıwına qızıǵıwshılıq bildirmekte. Memorandumda awǵanstanlı studentlerdiń Muhhammad al-Xorezmiy atındaǵı Tashkent málimleme texnologiyaları hám Inha universtitetinde bilim alıwın shólkemlestiriw de názerde tutılǵan.
Sóylesiwler sheńberinde «Ózbektelekom» AK jáne «Afghan Telecom Corporation» arasında túsinisiw memorandumına qol qoyıldı. Telekommunikaciya tarawınıń ekonomikalıq rawajlanıwdaǵı ornı esapqa alınıp, tárepler bul baǵdarda óz-ara xızmet kórsetiwdi jolǵa qoyıwǵa kelisip aldı.
– «Jol kartası»na tiykarlanıp ministrliklerimiz telekommunikaciya hám málimleme texnologiyaları tarawında birge islesiw baǵdarların belgilep aldı. Biz bir birimizdi qollap-quwatlap, internetke jedel jalǵanıwdı shólkemlestiriw boyınsha jańa imkaniyatlardı izleymiz, – deydi «Afghan Telecom Corporation» bas direktorı Ajmal Ayan. – Atap aytqanda, tárepler hár eki eldegi xalıqaralıq baylanıs xızmetlerine zárúrlikti úyreniw, soǵan bola maqsetli ráwishte «Ózbektelekom» hám «Afghan Telecom Corporation» kompaniyalarınıń kommunikaciya tarmaqları arqalı óz-ara ótkeriwsheńligin arttırıw boyınsha kelisimge eristi.
ÓzA
Ózbekstan Respublikası Málimleme texnologiyaların hám kommunikaciyaların rawajlandırıw ministriliginiń Jámiyetshilik hám ǴXQ menen baylanıslar bólimi menen birgelikte tayarlandı.