Paytaxtımızda usı jıl 12-14-mart kúnleri «Innovaciyalıq olimpiada» jarısınıń Qaraqalpaqstan Respublikalıq basqıshı bolıp ótti. Onda respublikamızdıń qala hám rayonlarınan qatnasqan jeńimpazlar ximiya, biologiya, fizika, matematika, informatika, tariyx, sızıw pánleri boyınsha onlayn test usılında sınaqlardan ótip, Qanlıkól rayonınan qatnasqan 20 oqıwshıdan jetewi sıylı orınlardı alıwǵa eristi.
Olardan rayonlıq xalıq bilimlerdiriw bólimine qaraslı 18-sanlı ulıwma bilim beriw mektebiniń 8-klass oqıwshısı Musa Aytmuratov matematika páninen, 19-sanlı qánigelestirilgen ulıwma bilim beriw mektebiniń 8-klass oqıwshısı Abatbay Karamatdinov fizika páninen sıylı 1-orındı alıwǵa miyasar bolıp, Ózbekstan Respublikalıq basqıshqa jollama alǵan bolsa, ximiya páninen 18-sanlı ulıwma bilim beriw mektebiniń 8-9-klass oqıwshıları, matematika páninen 19-sanlı qánigelestirilgen ulıwma bilim beriw mektebiniń 9-klass oqıwshısı 2-orınlardı, al matematika páninen 18-sanlı ulıwma bilim beriw mektebi menen informatika páninen 19-sanlı qánigelestirilgen ulıwma bilim beriw mektepleriniń 10-klass oqıwshıları 3-orın jeńimpazları boldı.
Esletip ótemiz, «Innovaciyalıq olimpiada» Respublikamızdıń ulıwma bilim beriw mektepleriniń qábiletli oqıwshıları arasında óz-ara doslıq qatnasıqlardı bekkemlew, oqıwshılardıń intellektuallıq oylaw qábiletlerin rawajlandırıw, olardıń pánler boyınsha bilimin, uqıplılıǵın arttırıw, pánlerden alǵan bilimlerin erkin kórsete alıwına imkaniyat jaratıp, oqıwshı jaslardıń bilimin jetilistiriw maqsetinde ótkerildi.
Qaraqalpaqstan xabar agentligi.