Ózbekstan Respublikası Prezidentiniń b i y l i g i
Ózbekstan Respublikası Prezidentiniń 2017-jıl 18-iyuldegi «Salıq hákimshiligin túp-tiykarınan jetilistiriw, salıqlar hám basqa da májbúriy tólemlerdiń jıynalıwın arttırıw ilajları haqqında»ǵı pármanı talapların ámelge asırıw boyınsha kórilip atırǵan ilajlarǵa qaramastan, Respublikalıq hám jergilikli byudjetlerdiń dáramatların arttırıwdıń qosımsha rezervlerin anıqlaw, salıq hákimshiligi procesine zamanagóy málimleme-kommunikaciya texnologiyaların engiziw, sırt ellerdiń salıq nızamshılıǵı hám hákimshiligi tarawındaǵı sınalǵan aldınǵı jetiskenliklerdi implementaciyalaw ilajları qanaatlandırarsız bolıp qalmaqta.
Bul respublika salıq uyımlarınıń jumısın, sonıń ishinde, olardıń salıq tólewshiler hám mámleketlik uyımlar menen óz-ara birge islesiw, salıq qarızların óz waqtında hám tolıq óndiriw, salıq qadaǵalawınıń zamanagóy túrleri menen usılların engiziw boyınsha jumısın bunnan bılay da jetilistiriw zárúrliginen dárek beredi.
Salıq nızamshılıǵın hám salıqqa tartıwdıń zamanagóy usılların, salıqlardıń tolıq jıynalıwı jáne byudjetke óz waqtında túsiwi ústinen nátiyjeli qadaǵalaw mexanizmlerin engiziw arqalı salıq-byudjet siyasatın bunnan bılay da jetilistiriw, byudjet procesiniń ashıq-aydınlıq dárejesin arttırıw maqsetinde:
Tómendegiler:
Ózbekstan Respublikası Salıq kodeksiniń jańa redakciyadaǵı joybarın tayarlaw boyınsha Respublikalıq komissiyanıń quramı 1-qosımshaǵa muwapıq;
salıq nızamshılıǵın hám salıq minnetlemelerin jetilistiriw boyınsha jumısshı toparlar 2-3-qosımshalarǵa muwapıq quramda dúzilsin.
Respublikalıq komissiya (A.N.Aripov) tiyisli normativlik-huqıqıy hújjetlerdiń joybarların islep shıǵıwda tómendegilerge:
ulıwma tán alınǵan xalıqaralıq normalar hám standartlar talapları jáne bazar ekonomikası principlerine juwap beretuǵın normalar jaratılıwına;
salıq qadaǵalawınıń shet elde keńnen qollanıp atırǵan aldınǵı hám sınalǵan túrleri menen usılların engiziwdi esapqa alǵan, sonıń ishinde, xalıqaralıq ekspert hám másláhátshilerdi tartqan halda salıq hákimshiligi mexanizmlerin qayta kórip shıǵıwǵa;
respublikalıq strategiyalıq mápler jáne ámelge asırılıp atırǵan sociallıq-ekonomikalıq reformalardıń búgingi basqıshın esapqa alǵan halda, salıq tarawındaǵı xalıqaralıq-huqıqıy normalardı milliy salıq nızamshılıǵına implementaciyalaw, sonday-aq, nátiyjeli mámleketlik salıq siyasatın ámelge asırıwǵa;
salıqqa tartıw hám salıq hákimshiligi máselelerin tártipke salatuǵın normativlik-huqıqıy hújjetlerden eki túrdegi versiya isleniwi múmkin bolǵan normalardı shıǵarıp taslaw maqsetinde olardı inventarizaciyalawǵa;
tikkeley ámel etetuǵın normalardı kóbeytken halda, salıq nızamshılıǵın unifikaciyalawǵa;
salıqqa tartıw sistemasın ápiwayılastırıw, salıq nızamshılıǵın jetilistiriw jáne salıq tólewshilerdiń huqıqları qorǵalıwın izbe-iz támiyinlewge;
salıqlardıń jıynalıw dárejesin kóteriw, Mámleketlik byudjet hám mámleketlik maqsetli qorlarǵa salıq hám jıyımlardıń tolıq kólemde túsiwin támiyinlew, salıqqa tartılıwdan taysalıw imkaniyatın qádeden qısqartıwǵa;
xojalıq júrgiziwshi subektlerdiń ulıwma salıq júgin jeńilletiw, óndiristi rawajlandırıw hám xızmet kórsetiw tarawlarında salıqlardıń xoshametlewshi rolin kúsheytiw, resurslardan aqılǵa uǵras hám únemli paydalanıwdı támiyinlew, nátiyjesiz salıq hám jıyımlardı biykarlawǵa;
kishi hám iri biznes subektleriniń salıq júgin maksimal dárejede teńlestiriwge xızmet etetuǵın usıllardı engiziwge;
shet ellerdiń aldınǵı tájiriybesin esapqa alǵan halda ámeldegi salıqqa tartıw sistemasın sın kóz qarastan úyreniw tiykarında fizikalıq shaxslardan alınatuǵın dáramat salıǵın esaplap shıǵıw mexanizmin ápiwayılastırıwǵa;
«salıq jeńilligi» hám «salıq preferenciyası» túsiniklerin anıq sheklewge, waqtınsha jeńillik beriw múddetlerin belgilew, sonday-aq, nátiyjesiz hám gónergen salıq jeńilliklerin qayta kórip shıǵıw hám biykarlawǵa;
isbilermenlerge biznestiń orta múddetli perspektivada rawajlanıwın tiykarlı túrde boljaw imkaniyatına iye bolıwı ushın salıq sistemasınıń turaqlılıǵın támiyinlewge ayrıqsha itibar qaratsın.
3. Respublikalıq komissiya (A.N.Aripov) hám jumısshı toparlar jetekshi ilimpazlar hám joqarı mamanlıqtaǵı qánigeler – ekspertler, isbilermenlik strukturaları hám jámiyetlik shólkemlerdiń wákillerin tartqan halda, dúnyanıń aldınǵı tájiriybesin tereń úyreniw jáne Ózbekstan Respublikası Prezidentiniń 2018-jıl 16-yanvardaǵı «Qarjı, salıq hám bajıxana uyımlarınıń jumısı sın kózqarastan úyreniliwin shólkemlestiriw haqqında»ǵı biyligine muwapıq salıq uyımlarınıń jumısın sın kózqarastan úyreniw nátiyjeleri tiykarında:
birinshi basqıshta – 2018-jıldıń 1-aprel kúnine shekem Ózbekstan Respublikası salıq-byudjet siyasatın jetilistiriw koncepciyası joybarın islep shıǵıw;
ekinshi basqıshta – 2018-jıldıń 1-iyul kúnine shekem Ózbekstan Respublikası Salıq kodeksiniń jańa redakciyadaǵı joybarın islep shıǵıwdı támiyinlesin.
4. Ózbekstan Respublikası Prezidenti janındaǵı Joybarlaw basqarması milliy agentligi Ózbekstan Respublikası Investiciyalar boyınsha mámleketlik komiteti hám Ózbekstan Respublikası Ekonomika ministrligi menen birgelikte Ózbekstan Respublikası Salıq kodeksiniń jańa redakciyasın islep shıǵıwǵa xalıqaralıq ekspertlerdi hám másláhátshilerdi tartıwda kómeklessin.
5. Usı biyliktiń orınlanıwın qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidenti janındaǵı Joybarlaw basqarması milliy agentliginiń direktorı Sh.M.Sodiqovqa júklensin.
Ózbekstan Respublikası Prezidenti Sh.MIRZIYoEV
Tashkent qalası,
2018-jıl 13-fevral