Assalawma áleykum, qádirli apa-sińliler!

Húrmetli doslar!

Hámmemiz asıǵıp kútken mine usı gózzal báhár kúnlerinde, 8-mart-Xalıqaralıq hayal-qızlar bayramı qarsańında, siz ázizler menen ushırasıp turǵanımnan oǵada quwanıshlıman.

Bárinen burın, sizlerdi, sizlerdiń tımsalıńızda barlıq analarımızdı, apa-sińlilerimizdi, dilbar qızlarımızdı áne usı bayram menen shın júrekten qutlıqlap, ózimniń tereń húrmet-izzetimdi bildiriwge ruqsat etkeysiz.

Bul qutlı áyyyamda húrmetli hayal-qızlarımızǵa shın júrekten shıqqan, eń jaqsı tileklerimizdi bildirer ekenbiz, birinshi gezekte muqaddes hám qádirli Ana tulǵasına bas iyemiz.

Hayaldıń gózzallıǵı hám názikligi, opadarlıǵı hám sadıqlıǵı, aqıl-parasatı hám pidayılıǵı ásirler dawamında jer júzinde ómirdiń dawamlılıǵına hám máńgiligine tiykar bolıp keledi. Sonlıqtan da dúnyadaǵı eń ullı kórkem óner dóretpeleri, qosıq hám odalar, arxitekturalıq estelikler hayal-qızlardıń húrmetine baǵıshlanǵan bolıp esaplanadı.

Shańaraq hám jámiyettiń ústini, ómirimizdiń qut-bereketi hám kórki bolǵan hayal-qızlardı qádirlew, olarǵa húrmet-izzet kórsetiw xalqımız ushın ázel-ázelden ullı qádriyat bolıp kelgen hám sonday bolıp qaladı. Sebebi sizler menen ómirimiz gózzal hám mazmunlı, shańaraqlarımız abat hám kewilli bolıp tabıladı.

Álbette, Ózbekstan dep atalǵan áziz Watanımızda hár bir márt jigit eń dáslep mehriyban anası, shańaraǵı, perzentleriniń baxıtlı bolıwın qáleydi, házireti Áliysher Nawayı babamız atap ótkenindey, bul jolda óziniń pútkil ómirin baǵıshlawǵa tayar turadı.

Búgingi bayramdı biz-Ózbekstan ulları, mártleri bárinen burın, júregimizde, qálbimizde sizlerge bolǵan mehir-muhabbatımızdı jáne bir márte bildiriw imkaniyatın beretuǵın áyyyam, dep qabıl etemiz.

Áziz hám húrmetli apa-sińliler!

Búgingi kúnde Ózbekstandı bunnan bılay da rawajlandırıw boyınsha Háreketler strategiyasında belgilep berilgen maqset hám wazıypalarǵa erisiwde siz, ázizlerdiń sheksiz úlesińiz bar. Bul ushın sizlerge hár qanday maqtawlar hám jaqsı sózler aytsaq, arzıydı, álbette.

Házirgi waqıtta elimizde hár qıylı tarawlar menen tarmaqlarda miynet etip atırǵan jumısshı hám xızmetkerlerdiń 45 procentin hayal-qızlar quraydı. Sonıń ishinde, mámleketlik hám jámiyetlik shólkemler sistemasında 1 mıń 400 ge shamalas apa-sińlilerimiz basshılıq lawazımlarında miynet etpekte. Olardan 17 si senator, 16 sı Oliy Majlis Nızamshılıq palatasınıń deputatı bolıp, 1 mıń 75 si bolsa xalıq deputatları jergilikli keńesleri quramında jumıs islemekte.

Onlaǵan apa-sińlilerimiz «Ózbekstan Qaharmanı», «Ózbekstan ilim ǵayratkeri», «Ózbekstan xalıq oqıtıwshısı», «Ózbekstan xalıq shayırı», «Ózbekstan xalıq artisti» sıyaqlı mámleketimizdiń joqarı húrmetli ataqlarına, orden hám medallarına iye bolǵan. Olardıń arasında 500 den zıyat ilim doktorları hám akademikler, mıńlaǵan ilim kandidatları óz bilimi hám talantı menen Watanımızdıń rawajlanıwına shın júrekten xızmet etpekte.

Búgingi ushırasıwımızda áne usınday qádirli hayallarımızdı, olardıń dawamshıları bolǵan talantlı qızlarımızdıń múnásip wákillerin kórip turǵanımnan quwanıshlıman.

Qádirli doslar!

Sizlerge jaqsı belgili, húrmetli apa-sińlilerimizdiń jámiyetlik turmıstaǵı ornın hám abıroyın arttırıw maqsetinde jaqında «Hayal-qızlardı qollap-quwatlaw hám shańaraq institutın bekkemlew tarawındaǵı jumısın túp-tiykarınan jetilistiriw ilajları haqqında»ǵı Prezident pármanı qabıl etildi.

Pármanda hayal-qızlardıń jámiyetlik-siyasiy belsendiligin kúsheytiw, nızamlı máplerin támiyinlew, talantın hám imkaniyatın júzege shıǵarıw, shańaraq institutın bekkemlew, analıqtı hám balalıqtı qorǵawǵa qaratılǵan kóplegen ilajlar belgilendi.

Hesh kimge sır emes, Hayal-qızlar komitetinen, onıń orınlardaǵı bólimlerinen kóplegen nárselerdi talap etetuǵın edik. Lekin, ashıq aytıw kerek, bul ushın olarda jeterlishe imkaniyat bar ma yaki joq pa, bul tuwralı kóbinese oylap kórmeytuǵın edik. Bul komitet hayal-qızlardıń mashqalaların bilgeni menen, olardı sheshiw boyınsha derlik ámeliy ilajlar kóre almaytuǵın edi.

Usılardıń barlıǵın esapqa alıp, bárinen burın Ózbekstan hayal-qızlar komiteti hám onıń aymaqlıq bólimleriniń jańalanǵan strukturaları tastıyıqlanıp, shtat birlikleri hám xızmetkerleriniń aylıq miynet haqısı arttırıldı. Olarǵa qosımsha wákillikler hám imkaniyatlar berilip, nátiyjeli jumıs islewi ushın zárúr sharayatlar jaratılmaqta.

Pármanǵa bola usı jıl 1-aprelden baslap puqaralardıń ózin-ózi basqarıw uyımlarında hayal-qızlar menen islesiw hám shańaraqlarda ruwxıy ádep-ikramlılıq qádriyatlardı bekkemlew boyınsha qánige lawazımı engizilmekte.

Soǵan itibar beriń, endi 8 mıń 800 bilimli, jankúyer qánige hayal-qızlar shańaraqlıq qatnasıqlardı jaqsılaw, kelispewshilik jaǵdaylardıń, ajırasıwlardıń, erte nekelerdiń aldın alıw, shańaraqlıq qádriyatlardı bekkemlew, hayal-qızlardıń ruwxıy ádep-ikramlılıq tárbiyası boyınsha turaqlı jumıs alıp baradı.

Hámmemiz jaqsı túsinemiz, búgingi tez ózgerip atırǵan, qarama-qarsılıqlı dáwirde shańaraqlıq máselelerdi ilimiy tiykarda tereń úyrenbey turıp, jámiyetlik turmıstaǵı kóplegen qıyın sorawlarǵa juwap tabıw qıyın. Sonıń ushın Ministrler Kabineti janında «Shańaraq» ilimiy-ámeliy izertlew orayı hám onıń aymaqlıq bólimleri shólkemlestirildi hám olardıń jumısların nátiyjeli jolǵa qoyıw, imarat hám zárúrli úskeneler menen támiyinlew ilajları kórilmekte.

Sonıń menen birge, burın Ádillik ministrligi qaramaǵında bolıp kelgen puqaralıq halatları aktlerin jazıw mákemeleri, eskishe aytqanda, ZAGS mákemeleri rayon yamasa qala hákiminiń orınbasarı – Hayal-qızlar komiteti baslıǵına boysındırıldı. Endi olar tek ǵana neke qatnasıqlarına baylanıslı hújjetlerdi rásmiylestiriw emes, al shańaraq institutların bekkemlew, shańaraqtaǵı ajırasıwlardıń aldın alıw boyınsha da belsene jumıs alıp baradı. Máselen, shańaraq universitetlerin shólkemlestiriw, nekeden ótetuǵın shaxslar menen sáwbetlesiw, toy-merekelerdi tártipli ótkeriw, ajırasıwlardıń aldın alıw hám basqa da áhmiyetli ilajlardı ámelge asırıwǵa qatnasadı.

Usı pursattan paydalanıp, siz, ádiwli apa-sińlilerimizden toy hám merekelerimizdi ıqsham jáne mazmunlı etip ótkeriw boyınsha óz pikirlerińizdi bildirip, onı sheship beriwińizdi ótinish etemen.

Pármanǵa muwapıq Hayal-qızlardı hám shańaraqtı hár tárepleme qollap-quwatlaw jámiyetlik fondı dúzilip, onıń jumısların nátiyjeli shólkemlestiriw ushın házirshe 300 milliard sum qarjı ajıratılmaqta.

Usı qarjı esabınan hayal-qızlardıń bántligin támiyinlew, miynet sharayatların jaqsılaw, ásirese, awıllıq jerlerdegi jas qızlardı shańaraqlıq hám jeke isbilermenlikke, ónermentshilikke keńnen tartıwǵa itibar qaratıladı. Bul baǵdardaǵı is-háreketler jedel isbilermenlikti rawajlandırıw, hayal-qızlardıń shańaraqtan, perzent tárbiyasınan ajıralmaǵan halda jumıstı úyge alıp islew, qıytaq jerlerde diyqanshılıq penen shuǵıllanıwı ushın zárúr sharayat jaratadı.

Qabıl etilgen pármanǵa muwapıq, kem támiyinlengen, jeke menshik turaq jayǵa mútáj bolǵan shańaraqlarǵa turaq jay alıw ushın ajıratılatuǵın kreditlerdiń baslanǵısh tólemlerin tólep beriwde de fond qarjılarınan paydalanıw belgilengen.

Pármanda jáne bir áhmiyetli jańalıq názerde tutılǵan. Oǵan bola usı jıldan baslap Zulfiya atındaǵı Mámleketlik sıylıqtı on tórt jasqa tolǵan hám otız jastan ótpegen talantlı qızlarǵa beriw boyınsha jańa tártip engizildi.

Endi hár jılı Qaraqalpaqstan Respublikası, wálayatlar hám Tashkent qalasınan eki qızǵa usı sıylıq beriledi.

Bıyıl 28 talantlı qızımız Zulfiya atındaǵı mámleketlik sıylıqqa iye boldı. Búgin olarǵa usı sıylıqlardı sizlerdiń aldıńızda saltanatlı túrde tapsıramız.

Álbette, Pármanda belgilep berilgen áhmiyetli wazıypalar haqqında jáne de kóp aytıw múmkin. Biraq, barlıǵımız jaqsı túsinemiz, bul wazıypalar ele – maqset, reje ǵana, olardı nátiyjeli ámelge asırıw ushın hámmemiz, eń aldı menen, siz, húrmetli hayal-qızlarımız benen birgelikte belsene jumıs alıp barıwımız kerek.

Húrmetli májilis qatnasıwshıları!

Xabarıńız bar, ótken bir jıl dawamında biz xalqımız, atap aytqanda, hayal-qızlar menen pikirlesiwdi mámleketlik siyasat dárejesine kóterdik. Usı tiykarda awıl hám qalalarımızda úyme-úy júrip, sociallıq-ruwxıy ortalıqtı úyreniw, bul baǵdardaǵı mashqalalardı sheshiw boyınsha nátiyjeli sistema jaratıldı. Búgingi kúnde usı sistemanıń áhmiyetli bólegi sıpatında oraydan baslap eń alıs rayonlarǵa shekem jámiyetlik qadaǵalaw toparları jumıs alıp barmaqta.

2017-jılı 5 millionnan aslam shańaraqtıń awhalı úyrenilip, 15 million puqara menen sáwbetlesiwler ótkerildi, xalıq tárepinen kóterilgen 500 mıńnan aslam mashqalanıń 72 procenti orınlarda sheshildi, 14 mıńnan aslam shańaraqtaǵı tınısh emes jaǵdaylar saplastırıldı. Solardıń qatarında elimizde jasap atırǵan, biraq puqaralıǵı bolmaǵan 1 mıń 100 den aslam shaxsqa Ózbekstan puqaralıǵı berildi. Olardıń arasında júzlegen hayal-qızlardıń bar ekenligi hám olarǵa degen ádilliktiń tiklengeni, álbette, insan huqıqları menen erkinliklerin támiyinlew jolındaǵı áhmiyetli qádem bolıp tabıladı.

Elimizde usı waqıtqa shekem hayal-qızlardı eń kóp qıynap kelgen másele – mektepke shekemgi bilimlendiriw mákemelerin rawajlandırıwǵa da ayrıqsha itibar qaratılmaqta. Bul tereń oylanǵan siyasat bolıp, elimizde úzliksiz tálim-tárbiya sistemasın joqarı dárejede qáliplestiriw imkanın beredi.

Usı kózqarastan alıp qaraǵanda, «Keleshek – baqshadan baslanadı» degen súren dábdebeli gáp emes. Negizinde watanǵa degen muhabbat, el-jurtqa degen pidayılıq bir qaraǵanda ápiwayı, biraq turmıslıq talap bolǵan usınday áhmiyetli jumıslardan baslanadı.

Biz bıyıl 3 mıńnan aslam balalar baqshasın shólkemlestiriwdi rejelestirgenbiz. Sonnan 1 mıń 200 baqsha jańadan qurıladı, 1 mıń 360 baqsha óz imaratlarında hám 470 baqsha bolsa úy baqshası sıpatında shólkemlestiriledi. Bul baǵdarda mámleketlik-jeke sheriklik qatnasıqları tiykarında aymaqlarǵa biriktirilgen kommerciyalıq bankler hám isbilermenlerdiń imkaniyatların keńnen iske qosamız.

Men aymaqlarǵa barǵanımda qala hám awıllarımızda qurılıp atırǵan jańa baqshalar, olardaǵı sharayatlar menen tanısıwǵa ayrıqsha dıqqat qarataman. Eń baslısı, bunday islerden analarımız, hayal-qızlarımız, kishkene perzentlerimizdiń kewli tolmaqta.

Sonıń menen birge, bul tarawda sheshiwimiz zárúr bolǵan máseleler de kóp. Máselen, bul sistemada jumıs alıp barıp atırǵan derlik 60 mıń tárbiyashınıń tek ǵana 21 procenti joqarı maǵlıwmatlı, qalǵanı bolsa orta arnawlı maǵlıwmatqa iye.

Áne, usı máseleni sheshiw ushın 2018-2019-oqıw jılınan baslap joqarı oqıw orınlarında mektepke shekemgi bilimlendiriw baǵdarı boyınsha kúndizgi bólimde bakalavrlardı tayarlaytuǵın 3 jıllıq sistemanı engizip atırmız. Sonday-aq, bul baǵdar boyınsha sırtqı hám keshki bilimlendiriw túrinde bakalavrlardı tayarlaw sisteması da jolǵa qoyıladı.

Mart ayınan baslap aymaqlarımızdaǵı universitet hám pedagogika institutları bazasında baqsha pedagogları hám usı tarawda qánige bolmaǵan kadrlar ushın yarım jıllıq oqıw baǵdarlamaları tiykarında qayta tayarlaw kursları shólkemlestirilmekte.

Xabarıńız bar, biz usı taraw xızmetkerleriniń mashaqatlı miynetin xoshametlew maqsetinde jaqında óz aldına qarar qabıl ettik. Oǵan bola, usı jıl 1-marttan baslap baqsha xızmetkerleriniń miynet haqısı eki basqıshta sezilerli ráwishte arttırıp barıladı. Mine, usı maqsetler ushın 2018-jılı mámleketlik byudjetten 386 milliard sum qosımsha qarjı ajıratıladı.

Bunnan tısqarı, 2023-jıldıń 1-yanvarına shekem Qaraqalpaqstan Respublikası, Xorezm, Nawayı, Qashqadárya, Surxandárya hám Buxara wálayatındaǵı ekonomikalıq jaǵdayı awır bolǵan ayırım rayonlarda mektepke shekemgi bilimlendiriw mákemelerinde baqsha tólemleri muǵdarı 50 procentke azaytıldı.

Qádirli watanlaslar!

Mámleketimizde analıq hám balalıqtı qorǵaw, hayal-qızlar salamatlıǵın bekkemlew maqsetinde medicina tarawın, atap aytqanda, qıstawlı medicinalıq járdem sistemasın bunnan bılay da jetilistiriw, dári-dármaq támiynatın jaqsılaw boyınsha kóp jumıslar islenbekte. Mine usı jumıslardı jańa basqıshqa kóteriw ushın bıyılǵı jılı byudjet qarjıları esabınan derlik 1 trillion sum qarjı ajıratılıp, bul baǵdarda jańa qádemler qoyıladı.

Barlıq aymaqlarda perinatal járdem sapasın jaqsılaw, analar hám balalarǵa kórsetiletuǵın medicinalıq xızmet dárejesin arttırıw maqsetinde xalıqaralıq qarjı institutlarınıń járdemin de tartıw názerde tutılmaqta.

Elimizde hayal-qızlardıń dem alıwı, densawlıǵın tiklewine de úlken itibar berilmekte. Bul haqqında sóz etkende, bir sanǵa dıqqatıńızdı qaratpaqshıman. Hár jılı kásiplik awqamlarına qaraslı sanatoriylerde dem alıp atırǵan xalıqtıń 60 procentin hayallar quramaqta. 2017-jılı 75 mıńǵa shamalas hayal mine usınday orınlarda jeńillikli jollamalar tiykarında salamatlastırıldı.

Sonıń menen birge, awıllıq shıpakerlik punktleriniń jumısın, profilaktika hám patronaj sistemasın bunnan bılay da jetilistiriw boyınsha keń kólemli jumıslar alıp barılmaqta.

Áyne payıtta hámmemiz jaqsı bilemiz, bul tarawda da mashqalalar joq emes. Atap aytqanda, hámiledar hayallardı skrining tekseriwinen ótkeriw jumısları talap dárejesinde emes. Bul baǵdardaǵı úlken kemshiliklerdi saplastırıw maqsetinde shańaraqlıq poliklinikalar hám awıllıq shıpakerlik punktlerinde qızlarımız, hayallarımız ushın óz aldına medicinalıq másláhátxanalar shólkemlestirilmekte.

Bul máselelerdiń áhmiyetin sizler ana sıpatında, tárbiyashı hám ustaz sıpatında basqalarǵa qaraǵanda jaqsıraq túsinesiz, dep oylayman.

Biz xalqımızdıń talap hám tileklerin inabatqa alıp, kóp jıllar dawamında awır másele bolıp kelgen turaq jay mashqalasın sheshiwge kiristik.

Bul baǵdarda, ásirese, ipoteka kreditleri tiykarında qurılıp atırǵan arzan turaq jaylar kópshilikke maqul bolmaqta.

Ótken jılı qala hám awıllarımızda jámi 3,5 million kvadrat metrden zıyat úlgi jaylar hám kóp qabatlı turaq jaylar salınıp, mıńlaǵan jurtlaslarımız jańa, zamanagóy turaq jaylarǵa iye boldı. Atap aytqanda, sociallıq qorǵawǵa mútáj hám mayıplıǵı bolǵan puqaralardıń turmıs sharayatın jaqsılaw, olarǵa jeńillikli jaylar ajıratıw boyınsha jańa sistema engizilgeni, ásirese, ayrıqsha áhmiyetke iye.

2017-jıldıń ózinde 1 mıń 207 mútáj, mayıp hayalǵa arzan turaq jaylar berildi. Olardıń 972 sine qáwender shólkemler tárepinen tigiw mashinaları alıp berilip, úy miyneti menen shuǵıllanıwı ushın sharayat jaratıldı.

Bıyılǵı jılı bul baǵdardaǵı jumıslarımız jáne de keńeytilip, 10 mıńnan aslam sociallıq járdemge mútáj, mayıp hayallar jumıs orınları menen támiyinlenedi. 2018-jılı xalıq, ásirese, jas shańaraqlardıń talabın esapqa alıp, arzan turaq jaylardı qurıw kólemi 1,5-2 esege arttırıladı. Bul maqsetler ushın 5 trillion 286 milliard sum qarjı sarplanadı.

Sonıń menen birge, awır turmıslıq sharayatta jasap atırǵan, baǵıwshısınan ayırılǵan, mayıplardı kútip qarap atırǵan shańaraqlarǵa 242 milliard sum qarjı ajıratıladı.

Ótken jılı elimiz boyınsha 120 mıńnan artıq isbilermen hayal-qızlarǵa jámi 2 trillion 700 milliard sumlıq kreditler berildi, 84 mıńnan aslam hayal-qızlarımız turaqlı jumıs orınları menen támiyinlendi, hayallardı kásipke oqıtıw kursları shólkemlestirilip, olarda mıńlaǵan apa-sińlilerimiz túrli kásiplerge úyretildi.

Sizlerge málim, biz 2018-jıldı elimizde Jedel isbilermenlikti, innovaciyalıq ideyalardı hám texnologiyalardı qollap-quwatlaw jılı, dep járiyaladıq. Usı múnásibet penen qabıl etilgen Mámleketlik baǵdarlama sheńberinde isbilermen hayallarǵa bıyıl 2 trillion 800 milliard sumlıq kredit qarjıların ajıratıw mólsherlenbekte.

Isbilermenlik subektleriniń jumısların tekseriw boyınsha eki jıllıq moratoriy járiyalanǵanı shańaraqlıq biznes, úy miyneti, jeke isbilermenliktiń rawajlanıwı ushın keń imkaniyatlar ashıp bermekte.

Ótken jılı mádeniy-gumanitar tarawlardı rawajlandırıw boyınsha islengen jumıslar da hayal-qızlardıń turmıslıq máplerine tikkeley qatnası bar, dep oylayman. Sonıń ishinde, Qaraqalpaqstan Respublikası hám bir qatar wálayatlarda joqarı oqıw orınlarınıń filialları, talantlı ul-qızlarımız ushın ullı jazıwshılarımızdıń atları menen atalǵan dóretiwshilik mektepleri hám «Temurbekler mektepleri», «Ulıǵbekler mektepleri» qurıldı.

Álbette, sheńberi hám kólemi barǵan sayın keńeyip baratırǵan bunday iygilikli islerimiz haqqında jáne kóplep mısallar keltiriw múmkin. Lekin, biz bul islerdiń barlıǵın úlken joldaǵı dáslepki qádemler, dep bilemiz. Turmısımızdı jańalaw, analarımız, apa-sińlilerimizdi razı etiw maqsetinde baslaǵan islerimiz biz kútken ámeliy nátiyjelerdi beriwi ushın keleshekte olardı jáne de kúsheytemiz.

Húrmetli watanlaslar!

Búgingi kúnde xalıqaralıq terrorizm, ekstremizm, narkotrafik, nızamsız migraciya, adam sawdası, ekologiyalıq mashqalalar kúsheyip atırǵanı pútkil insaniyattı, sonıń ishinde, bizdi de qattı qáweterge salmaqta. Bunday quramalı sharayatta elimizde hám regionımızda tınıshlıq hám turaqlılıqtı saqlaw hár qashanǵıdan da ayrıqsha áhmiyetke iye bolıp barmaqta.

Biz bul baǵdarda qońsı mámleketler menen sheriklik baylanısların rawajlandırıwǵa ayrıqsha itibar bermektemiz.

Mine, búgin-erteń Tájikstan Respublikasına mámleketlik sapar menen baramız. Jaqın qońsımız bolǵan bul mámleket penen de kóplegen áhmiyetli máselelerdi óz-ara dodalap, olardı ámeliy jaqtan sheshiw niyetindemiz.

Biz sırt ellerde nızamlı tiykarda miynet etip atırǵan, bilim alıp atırǵan puqaralarımızǵa múnásibetti túp-tiykarınan ózgerttik.

Elimizden arnawlı delegaciyalar barıp, sırt ellerdegi watanlaslarımız benen ushırasıwlar ótkerip atırǵanı, olardıń miynet hám jasaw sharayatların jaqsılaw, haq-huqıqların támiyinlew boyınsha jergilikli basqarıw mákemeleri menen birgelikte zárúr ilajlar kórilip atırǵanınan sizler xabardarsız, dep oylayman. Atap aytqanda, sırt mámleketlerde tabıslı islep atırǵan joqarı mamanlıqtaǵı ilimpaz hám qánigelerimiz, shıpakerler, uqıplı investorlar – olardıń arasında talantlı apa-qarındaslarımız da kóp – elimizge mirát etip, óz bilim hám tájiriybesin Watanımızdı rawajlandırıw jolında isletiwi ushın barlıq sharayatlardı jaratıp bermektemiz. Sebebi, bul insanlar da biziń watanlaslarımız, Ózbekstan puqaraları. Sonıń ushın biz bul islerdi aldaǵı waqıtları jáne de kúsheytemiz.

Bárshege belgili, elimizde sociallıq-ruwxıy ortalıqtı salamatlastırıw maqsetinde diniy-ekstremistlik aǵımǵa tiyisli shaxs sıpatında esapta turatuǵın puqaralarǵa múnásibetimizdi pútkilley ózgerttik. Bunday shaxslardı ózimizge jaqın alıp, dártin tıńlaǵanımız búgin óz nátiyjesin bermekte. Házirgi waqıtta mine usınday mıńlaǵan puqaralar salamat turmıs tárizine qaytarıldı.

Bul dúnyada eń jaman nárse ne? Ǵáremet tasların jabıw emes pe? Usı kózqarastan alıp qaraǵanda bul insanlardıń shańaraǵı, perzentleri «Bul pálensheniń hayalı», «Bul pálensheniń balası» degen hár qıylı ǵáremetlerden qutılǵanı eń úlken is boldı. Endi olar máhállede, mektepte, kóshede basın kóterip, jámiyetlik turmısımızda belsene qatnasıw imkaniyatına iye boldı. Búgingi kúnde mine usı puqaralardıń turmıslıq mashqalaların sheshiw, jumısqa ornalastırıw, isbilermenlik penen shuǵıllanıw tilegin bildirgenlerge bank kreditlerin ajıratıw boyınsha anıq ilajlar kórilmekte.

Elimizde durıs joldan adasqan insanlar ulıwma bolmaslıǵı ushın bul baǵdardaǵı jumıslardı tómenletpey, izbe-iz dawam ettiriwimiz kerek. Óz jumısımızdı jawızlıqqa qarsı aǵartıwshılıq tiykarında shólkemlestiriwimiz tiyis. Ózbekstandaǵı Islam civilizaciyası orayı, Imam Buxariy hám Imam Termiziy atındaǵı xalıqaralıq ilimiy-izertlew orayları, Islam akademiyası sıyaqlı ilimiy-aǵartıwshılıq mákemeleri de áne usı maqsetlerdi gózlep shólkemlestirilgeni hámmeńizge jaqsı belgili, dep oylayman.

Siz, húrmetli hayal-qızlarımız ózińizdiń analıq mehrińiz, turmıslıq bilim hám tájiriybeńiz benen perzentlerimizdi hár qıylı qáwip-qáterlerden saqlawda, olardı bekkem erk-ıqrarlı, ruwxıy-intellektual jaqtan jetik, áziz Watanımızǵa sadıq insanlar etip tárbiyalawda bunnan bılay da kúsh-ǵayratıńızdı ayamaysız, dep isenemen. Ásirese, qız balalardı turmısqa tayarlaw, olardı zamanagóy bilimler, kásip-ónerlerge úyretiwde biz bárinen burın sizlerge súyenemiz.

Xabarıńız bar, ótken jılı kópshilik ata-analar, jaslarımız, keń jámiyetshilik tárepinen bildirilgen usınıslardı esapqa alıp, ulıwma bilim beriw mekteplerinde 11 jıllıq sistemanı tikledik. Bunday qarardı qabıl etiwde birinshi gezekte sizlerdiń pikirińizdi itibarǵa alǵanımız, qızlarımızdıń táǵdiri, keleshegi haqqında oylaǵanımız – bul da áyne haqıyqat. Sebebi, qız bala alıs qala yaki rayondaǵı kolledjge barmastan, ata-anasınıń bawırında turıp, óziniń qádirdan mektebinde oqıwdı dawam ettirse, onıń ózi de, shańaraǵı da tınısh-qáterjam boladı. Perzentler tınıshlıǵı, olardıń baxtı, kamalı – jámiyettiń eń úlken baylıǵı. Bunıń áhmiyetin ata-ana bolǵan adam biledi. Ásirese, házirgi tınıshsız, quramalı zamanda bul haqıyqatlıqtı jáne de tereńirek ańlaw – bul da turmıs talabı.

Húrmetli ánjuman qatnasıwshıları!

Búgingi májilisimizde húrmetli miymanlarımız – Amerika Qurama Shtatları elshisi Pamela Spratlen xanım, Qıtay Xalıq Respublikası elshisi Czyan Yan xanım, Franciya elshisi Violen de Vilmor xanım, Egipet Arab Respublikası elshisi Amani Eletr xanım, Birlesken Milletler Shólkeminiń Ózbekstandaǵı wákilxanası baslıǵı Xelena Freyzer xanımlar qatnasıp, bayram quwanıshın biz benen bólispekte. Bul áziz miymanlarımızdı sizlerdiń atıńızdan, ózimniń atımnan shın kewlimnen qutlıqlap, olardıń aldaǵı jumıslarında úlken tabıslar hám áwmetler tilewge ruxsat etkeysiz.

Qádirli apa-sińliler!

Biz qala hám awıllarımız, pútkil elimizdi bunnan bılay da rawajlandarıw, xalqımız turmısın múnásip dárejege kóteriw boyınsha qanday reje hám baǵdarlamalar qabıllasaq, eń dáslep siz, ázizlerdiń arzıw-niyetlerińiz hám máplerińizdi júzege shıǵarıwdı óz aldımızǵa wazıypa etip qoyǵanbız. Házirgi kúnde bul baǵdarda úlken ámeliy jumıslardı baslap atırmız.

Pútkil mámleketimiz boyınsha zamanagóy joybarlar tiykarında úlken qurılıs hám abadanlastırıw jumısları ámelge asırılmaqta. Bul baǵdarda ásirese, «Abat awıl» baǵdarlaması ayrıqsha áhmiyekte iye. Bul bárinen burın hayal-qızlarımızdıń turmıs sharayatın jaqsılaw, olardıń keypiyatı, dúnyaqarasın rawajlandırıwǵa júdá úlken unamlı tásir kórsetetuǵın baǵdarlama bolıp tabıladı. Mine usınday baǵdarlamalarımız tiykarında jollar, bilimlendiriw hám medicina, mádeniyat, sport máskanları, turaq jaylar jańalanbaqta. Mıńlaǵan zamanagóy óndiris kárxanaları, kishi biznes, turizm hám xızmet kórsetiw obektleri qurılmaqta.

Ásirese, ishki turizm boyınsha jaratılıp atırǵan imkaniyatlar elimiz boylap sayaxan etiw, óz tariyxımızdı hám mádeniyatımızdı jáne de tereń biliwge qaratılǵanı menen itibarlı.

Nawrız bayramı múnásibeti menen belgilengen qosımsha dem alıs kúnlerinde sizler shańaraǵıńız, perzentlerińiz benen mine usınday sharayatlardan paydalanıp, mazmunlı dem alıw imkaniyatına iye bolasız, dep oylayman.

Áziz apa-sińliler!

Sózimniń sońında bársheńizdi Xalıqaralıq hayal-qızlar bayramı menen jáne bir márte shın kewlimnen qutlıqlayman.

Meniń tilegim, meniń maqsetim birew ­ shańaraǵıńız, perzentlerińiz, el-jurtımız baxtına hámiyshe saw-salamat bolıńlar!

Nege degende, hayal-qızlarımızdıń baxtı ­ xalqımız, jámiyetimizdiń baxtı. Bársheńizge shańaraqlıq qáterjamlıq, úylerińizge tınıshlıq, qut-bereket tileymen. Hámiyshe xalqımız, Watanımızdıń joqarı mehri hám ardaǵında bolıw hámmeńizge nesip etsin!

Úlken raxmet sizlerge