Ózbekstan Respublikası Oliy Majlisi Senatı hám Nızamshılıq palatasında 5-mart kúni Túrkiya parlamentiniń «Túrkiya-Ózbekstan» parlamentleraralıq doslıq toparınıń baslıǵı Haydar Ali Yildiz basshılıǵındaǵı Túrkiya Respublikasınıń Ullı millet májilisi delegaciyası menen ushırasıwlar bolıp ótti.
Ózbekstan Respublikası Oliy Majlisi Senatınıń Baslıǵı N.Ywldoshev penen ushırasıwda doslıq hám óz-ara isenimge tiykarlanǵan Ózbekstan-Túrkiya birge islesiwi hár qıylı baǵdarlarda jedel rawajlanıp, parlamentleraralıq qatnasıqlar bekkemlenip baratırǵanı bolsa óz-ara qatnasıqlardıń bunnan bılay da keńeyiwine xızmet etip atırǵanı atap ótildi.
Túrkiya Respublikası menen barlıq tarawlardaǵı birge islesiw, atap aytqanda, parlamentleraralıq qatnasıqlardıń rawajlandırılıwı Ózbekstan sırtqı siyasatınıń eń áhmiyetli tiykarǵı baǵdarlarınan biri bolıp esaplanadı. Túrkiya Respublikası parlamenti delegaciyasınıń bul sapar etiwi parlamentleraralıq sóylesiw hám Ózbekstan Respublikası Prezidenti Shavkat Mirziyoevtiń 2017-jıldıń oktyabr ayında Túrkiya Respublikasına mámleketlik saparı dawamında erisilgen kelisimlerdiń ámeliy nátiyjesi bolıp esaplanadı.
Ózbekstan Respublikası Oliy Majlisi Nızamshılıq palatasınıń Spikeri N.Ismoilov penen sóylesiwde eki eldiń nızam shıǵarıwshı uyımları arasındaǵı baylanıslar, sonday-aq, sawda-ekonomikalıq, investiciyalıq hám mádeniy-gumanitarlıq birge islesiwdiń búgingi jaǵdayı, onı bunnan bılay da rawajlandırıw hám tereńlestiriw principleri dodalandı.
Miymanlarǵa elimizde ámelge asırılıp atırǵan keń kólemli reformalar tuwralı aytıp ótildi.
Ushırasıwlarda Haydar Ali Yildiz sońǵı waqıtları eki eldiń joqarı wákillikli uyımları arasındaǵı baylanıslar belsene rawajlanıp atırǵanın ayrıqsha atap ótti. Bul sıyaqlı ámeliy baylanıslar ellerimiz arasındaǵı siyasiy, sawda-ekonomikalıq, mádeniy-gumanitarlıq hám, álbette, parlamentleraralıq birge islesiwdi bunnan bılay da rawajlandırıwǵa xızmet etetuǵının atap ótti.
Sonday-aq, Túrkiya parlamenti delegaciyasınıń elimizge saparı sheńberinde Ózbekstan Respublikası Oliy Majlisiniń Túrkiya Respublikası Ullı millet májilisi menen birge islesiw boyınsha parlamentleraralıq toparı menen Túrkiya Respublikası Ullı millet májilisiniń «Túrkiya-Ózbekstan» parlamentleraralıq doslıq toparınıń birinshi qospa májilisi ótkerildi.
Sóylesiwdiń juwmaǵında Ózbekstan Respublikası Oliy Majlisi Túrkiya Respublikası Ullı millet májilisi menen birge islesiw boyınsha parlamentleraralıq toparı menen Turkiya Respublikası Ullı millet májilisiniń «Túrkiya-Ózbekstan» parlamentleraralıq doslıq toparı arasında óz-ara birge islesiwdi bunnan bılay da rawajlandırıw boyınsha 2018-jılǵa mólsherlengen ámeliy ilajlar rejesi («Jol kartası»)ne qol qoyıldı.
Túrkiya delegaciyasınıń saparı sheńberinde Ózbekstan hám Túrkiya isbilermen toparlarınıń qatnasıwında biznes-forum hám kooperaciyalıq birja da ótkerildi. Sawda-sanaat palatası hám Oliy Majlis Senatı menen birgelikte shólkemlestirilgen forumda eki eldiń ekonomika, investiciya, sawda-sanaat, turizm, qurılıs, elektrotexnika, awıl xojalıǵı, azıq-awqat, jeńil sanaat, toqımashılıq sıyaqlı tarawlar ushın juwapker ministrlikleri hám vedmostvoları, kompaniyalarınıń basshıları qatnastı.
Ánjumanda túrkiyalı isbilermenler elimizge investiciya kirgiziw principleri, óndiris hám qayta islew tarawı, toqımashılıq hám jeńil sanaat, turizm tarawındaǵı imkaniyatlar menen tanıstı. Awıl xojalıǵı ónimlerin jetistiriw hám qayta islew, saqlaw, qadaqlaw, azıq-awqat ónimlerin eksport etiwge qánigelestirilgen komplekslerdi qurıw, toqımashılıq hám tekstil sanaatında jańa joybarlardı ámelge asırıw sıyaqlı bir qatar máseleler dodalandı.
Sol kúni túrkiyalı miymanlar Xalıqaralıq press-klubtıń «Ózbekstan-Túrkiya sawda-ekonomikalıq hám investiciyalıq birge islesiwiniń rawajlanıw perspektivaları» temasında shólkemlestirilgen gezektegi májilisinda qatnastı.
Uluǵbek ShONAZAROV,
ÓzA nıń xabarshısı