Prezidentimiz Shavkat Mirziyoev ótken jılı 15-16-dekabr kúnleri respublikamızǵa bolǵan saparı dawamında Shımbay rayonındaǵı 8-sanlı «Ǵumsha» mektepke shekemgi bilimlendiriw mákemesinde bolǵan edi.
Biz bul «Ǵumsha» MShBM mákemesinde bolıp, olardıń jumısı menen tanıstıq.
Baqsha rayon orayındaǵı «Temir jol gúzarı» mákan puqaralar jıyını aymaǵında jaylasqan. 1992-jılı qurılǵan, 140 bala ushın mólsherlengen baqshada 6 toparda 16 pedagog balalarǵa tálim-tárbiya bermekte.
Balalar ushın inglis, orıs tilleri, taekvondo, kórkem gimnastika dógerekleri turaqlı islep tur.
Baqshaǵa búgingi kúnde Sarbinaz Akimniyazova basshılıq etip kelmekte. Ol Ájiniyaz atındaǵı Nókis mámleketlik pedagogikalıq institutınıń Mektepke shekemgi bilimlendiriw fakultetin tamamlaǵan. 20 jıl dawamında Shımbay rayonlıq xalıq bilimlendiriw bóliminde mektepke shekemgi bilimlendiriw mákemeleri metodisti bolıp, jemisli miynet etken.
– Keleshek áwladtıń salamatlıǵın támiyinlew, balalardıń fizikalıq hám ruwxıy jaqtan jetik insanlar bolıp jetilisiwinde mektepke shekemgi bilimlendiriw mákemeleriniń ornı girewli. Ásirese, Elbasshımızdıń názeri túsip, bizlerdiń baqshamızda bolǵanınan sheksiz quwanıshtamız. Prezidentimiz baqshamızda balalarǵa jaratılǵan sharayatlar menen tanıstı – deydi baqsha meńgeriwshisi S.Akimniyazova. Baqsha átirapındaǵı qıytaq jerge pomidor, qıyar, geshir, piyaz hám basqa da palız eginlerin egip alamız. Al, atızımızdaǵı alma, almurt, qáreli, shabdal, júzim miyweleri pisip jetiliskende balalarımızǵa beremiz. Awısqanın kompot etip qıstıń kúnleri ishkizemiz.
Baqshada dene tárbiyası hám muzıka menen shuǵıllanıw ushın zal, rawajlandırıwshı shınıǵıwlardı úyretetuǵın dógerek bólmeleri, medicinalıq blok hám psixologiya bólmeleri, asxana islep tur. Hár bir topar ishinen kishigirim kitapxana shólkemlestirilip, olar tolıq túrde jańa ásbap-úskeneler menen támiyinlendi. Sonday-aq, MShBMnıń átirapına oyın kompleksleri, ráńbáreń súwretli háwliler qurılǵan. Baqsha átirapı hár túrli terek nálleri hám gújim teregi menen qorshalǵan.
Baqshanıń hár bir toparına kameralar ornatılǵan. Sonday-aq, ata-analar menen islesiw múyeshi shólkemlestirilip, balalarǵa beriletuǵın awqatlardıń dizimi jazıp qoyılǵan. Bul arqalı ata-analar balalarınıń awqatlanıw jaǵdaylarınan xabardar bolıp turadı.
Baqshada tájiriybeli tárbiyashılardan Lola Seytmuratova, Gúlbáhár Aybekova, Rita Tilewmuratova, Sayora Bekmurzaeva, Kamila Pirjanova, Jarqınay Nawrızbaevalar, balalar densawlıǵın saqlawda miyiribiyke Rano Jalieva, psixolog Baldanay Qazievalar keleshegimiz bolǵan balalarımızdı tárbiyalawda jemisli miynet etip kelmekte.
Balalar ushın sapalı hám isenimli gósh, sonday-aq, gósh ónimleri «Sarımsaq oy» fermer xojalıǵı, azıq-awqat-ónimleri «Shımbay kótere-sawda invest» JShJ, sút hám sút ónimleri «Alawatdin» fermer xojalıǵı, balıq ónimlerin «Arzıw» fermer xojalıǵı jetkerip bermekte.
Baqsha jámááti házirgi kúnde 8-mart – Hayal-qızlar bayramı qarsańında «Anam hám men – sportshılar shańaraǵımız» atamasında sport jarısın hám topar tárbiyashıları arasında «Eń jaqsı topar» tańlawların ótkeriwge qızǵın tayarlıq kórmekte.
21-mart – Xalıqaralıq «Nawrız» bayramın baqsha jámááti joqarı kóterińkilikte ótkerip, «Súmelek» qaynatadı. Sonday-aq, baqshada «Assalam Nawrız, báhár bayramı» atamasında koncert baǵdarlamasın ótkeriw rejelestirilmekte.
Sonday-aq, baqsha tárbiyalanıwshıları «Soǵlomjon-polvonjon», «Kichkintoy-shirintoy», «Kim epshil, kim shaqqan» sport jarıslarına belsene qatnasıp kelmekte.
Tárbiya SEYTNAZAROVA,
Qaraqalpaqstan xabar agentligi xabarshısı