Ibrayım Yusupov atındaǵı qánigelestirilgen mámleketlik mektep-internatınıń 10-klass oqıwshısı Ayjamal Qalıbaeva Tashkenttegi «Túrkistan» sarayında bolıp ótken Islam Kárimov atındaǵı Respublikalıq qayırqomlıq jámiyetlik qorı tárepinen tayarlanǵan hám basıp shıǵarılǵan «Islam Kárimov – biyǵárez Ózbekistannıń tiykarın salıwshısı» kitap-albomı menen tanıstırıwǵa baǵıshlanǵan «Jalın kibi janıp, ózgelerdiń jolın jarıq et» súreni astında ótken saltanatlı máresimde «Islam Karimov – Wzbekiston Respublikasi Birinchi Prezidenti» estelik medalı menen sıylıqlandı.
Prezidentimizdiń baslaması menen 2017-jıl 27-noyabrde «Ózbekstan Respublikasınıń Birinshi Prezidenti, ullı mámleketlik hám siyasiy ǵayratker Islam Ábdiǵanievich Kárimov tuwılǵanınıń 80 jıllıǵın belgilew haqqında»ǵı qarardıń orınlanıwı sheńberinde elimizde izbe-iz jumıslar ámelge asırılmaqta. «Jalın kibi janıp, ózgelerdiń jolın jarıq et» súreni astında ótken saltanatlı máresimde Ayjamal Qalıbaeva Birinshi Prezidentimizdiń eń qıyın dáwirlerde jaslardı aqıllı, bilimli etip tárbiyalawǵa, ásirese, hayal-qızlardı qollap-quwatlawǵa ayrıqsha itibar qaratqanı, Zulfiya atındaǵı mámleketlik sıylıqtıń engizilgeni hám bilimlendiriw tarawında úlken jetiskenliklerge erisilgeni haqqında rus tilinde óziniń júrek sózlerin, pikirlerin bildirdi.
– Aldın paytaxtımızda bolıp ótken ilajda shıǵıp sóyledim, Tashkenttegi úlken saxnaǵa birinshi shıǵıwım, dáslep tolqınlandım. Sonda Birinshi Prezidentimizdiń «Barlıq qızlar meniń qızım», «Perzetlerimiz bizden kóre kúshli, bilimli, dana hám álbette baxıtlı bolıwı shárt» degen sózlerin esledim hám bul maǵan ilham baǵısh etti, mende kúsh-jiger payda boldı, – deydi Ayjamal. – Ilaj mende úlken tásir qaldırdı. Keleshekte jurnalist bolmaqshıman.
Orıs, inglis tillerin úyrendim. Házirgi kúnde koreys tilin úyrenip atırman. Til úyreniwimde toǵız jıl bilim alǵan «Progress» Bilimlendiriw hám rawajlandırıw orayınıń roli ayrıqsha. Ata-anamnan ótken jazıwshılıq qábiletim bar. Kishkene waqtımnan qaǵaz «shıjbaylaw»dı jaqsı kóremen. Búgingi kúnde mektep-internatta qábiletimdi rawajlandırıwǵa ustazlarım bar kúsh-jigerin jumsamaqta. Ásirese, direktorımız Paraxat Palımovtıń, orıs tili páni oqıtıwshım Olga Utemuratovanıń, qaraqalpaq tili hám ádebiyatı páni oqıtıwshım Nurlıbay Allamuratovtıń hám basqa da ustazlarımnıń miynetleri ayrıqsha. Erteklerdi orıs hám inglis tillerine awdarıp, shet tillerde shıǵarıwdı niyet etkenmen. Qosıqlarım, gúrrińlerim jergilikli basılımlarda jarıq kórgeni menen ele kitap bolıp shıqpadı. Búgingi kúnde kishigirim kitabım basılıp shıǵıw aldında tur.
Kitap-albomda Prezidentimiz Shavkat Mirziyoevtıń alǵı sózi keltirilgen. Sonıń menen birge, Birinshi Prezidentimizdiń hár túrli jıllardaǵı miynet jolına baylanıslı súwretleri, sırt el basshılarınıń, mámleketlik hám siyasiy ǵayratkerlerdiń hám basqa da abıroylı adamlardıń Islam Kárimov haqqında bildirgen jıllı pikirleri, shın júrekten aytılǵan sózleri orın alǵan.
– Mektep-internatımızda qábiletli oqıwshılar bilim almaqta, biraq Ayjamal basqa oqıwshılardan ziyrekligi, izleniwsheńligi, pikirin erkin bildiriwshilik uqıbı menen ayrıqshalanadı, – deydi ustazı N.Allamuratov. – Ol qosıq jazıw menen birge qosıqlardı talqılaw sırların tereń úyrenbekte. Ullı shayırımız I.Yusupovtıń shıǵarmaların orıs, inglis tillerine awdarma islewdi niyet etken. Tashkentte onıń «Islam Karimov Wzbekiston Respublikasi Birinchi Prezidenti» estelik medalı, biybaha kitaplar menen sıylıqlanǵanı talpıǵan talanqa xoshamet boldı hám bul keleshekte joqarı nátiyjelerge erisiwine tiykar boladı.
Móldir Igilikova,
Qaraqalpaqstan xabar agentliginiń xabarshısı