Tashkentte 23-fevral kúni Ózbekstan hám AQSh isbilermen toparlarınıń onlayn videosóylesiwi bolıp ótti.
Ózbekstan Sawda-sanaat palatası tárepinen Amerika – Ózbekstan sawda palatası menen birgelikte shólkemlestirilgen videosóylesiwde sawda, investiciya, ekonomika, awıl xojalıǵı, toqımashılıq, farmacevtika, ximiya hám azıq-awqat sanaatı, elektron ónimler hám qurılıs materialların islep shıǵarıw sıyaqlı tarawlar ushın juwapker ministrlikler menen vedomstvolardıń, koncernler hám kompaniyalardıń wákilleri qatnastı.
Sawda-sanaat palatasınıń baslıǵı A.Ikramov, Ózbekstannıń AQShtaǵı Ayrıqsha hám tolıq huqıqlı elshisi J.Vahobov hám basqalar ellerimiz arasında sawda-ekonomikalıq hám investiciyalıq birge islesiw rawajlanıp atırǵanın, Amerika – Ózbekstan sawda palatası qospa joybarlardı qollap-quwatlaw hám ámelge asırıwdıń áhmiyetli mexanizmine aylanıp atırǵanın atap ótti.
Amerika – Ózbekstan sawda palatasınıń atqarıwshı direktorı E.Son, sonday-aq, amerikalı isbilermenler Prezident Shavkat Mirziyoevtiń 2017-jıl 18-20-sentyabr kúnleri AQShqa saparı waqtında bir topar jetekshi kompaniyalardıń basshıları menen bolǵan ushırasıw ellerimiz isbilermenleri arasındaǵı birge islesiwdi jańa mazmun menen bayıtıwda, eki táreptiń imkaniyatların keńirek iske qosıwda áhmiyetli faktor bolıp atırǵanın atap ótti.
Ózbekstannıń ekonomikalıq, jámiyetlik-siyasiy, mádeniy-gumanitarlıq, ruwxıy-aǵartıwshılıq turmısında ótkerilip atırǵan reformalar xalıqaralıq jámiyetshilikte úlken qızıǵıwshılıq oyatpaqta. Ásirese, ekonomikalıq tarmaqta ámelge asırılǵan keń kólemli ilajlarǵa xalıqaralıq sınshılar unamlı baha bermekte. Elimizde isbilermenlik ortalıǵın bunnan bılay da erkinlestiriw, kishi biznes hám jeke isbilermenlik subektlerin qollap-quwatlaw baǵdarındaǵı jańalanıwlar Ózbekstannıń investiciyalıq tartımlılıǵı bunnan bılay da artıwına xızmet etpekte. Búgingi kúnde elimizde amerikalı isbilermenler menen birgelikte dúzilgen 160 tan aslam kárxana jumıs alıp barıp atırǵanı Ózbekstanda investorlarǵa qosımsha qolaylıq, jeńillik jaratıw, valyuta siyasatın liberallastırıw baǵdarındaǵı jumıslardıń nátiyjesi, dep aytıw múmkin.
Onlayn videosóylesiwde amerikalı isbilermenlerge elimizde túrli tarawlarda, sonıń ishinde, agrar sanaatta jumıs alıp barıp atırǵan shet elli investorlar menen sherikler ushın bir qatar salıq hám bajıxana jeńillikleri engizilgeni haqqında maǵlıwmat berildi.
Ilajda Amerikanıń «WCC International» kompaniyasınıń juwapker adamları elimizdiń eksport potencialın arttırıw, Ózbekstanda islep shıǵarılǵan ónimlerdi AQSh bazarına alıp kiriw imkaniyatları, xalıqaralıq marketing, elektron kommerciya sıyaqlı temalardaǵı tanıstırıwları menen qatnastı. AQSh isbilermen toparları wákilleri ózbekstanlı isbilermenler menen birge islesiwdi bunnan bılay da keńeytiwden hám bekkemlewden mápdar ekenin atap ótti.
Ulıǵbek ShONAZAROV,
ÓzAnıń xabarshısı