Mámleketimizde korrupciyanıń aldın alıw hám oǵan qarsı gúresiw boyınsha normativlik-huqıqıy baza hám sistema qáliplestirildi.
Mámleketlik xızmetler kórsetiwdi sanlastırıw arqalı insan faktorı minimal dárejege azaytıldı. Mámleketlik uyımlar hám shólkemler jumısınıń ashıqlıǵın támiyinlew boyınsha unamlı jetiskenliklerge erisildi.
Bıyılǵı jılı «Máplerdiń soqlıǵısıwı haqqında»ǵı nızam qabıl etilgeni korrupciyalıq faktorlardı óz waqtında anıqlaw hám saplastırıwdıń áhmiyetli mexanizmlerin belgilep berdi.
Usı nızamnıń ámeliyatqa engiziliwin támiyinlew maqsetinde qabıl etilgen Prezidenttiń «Mápler soqlıǵısıwı haqqında»ǵı qararı menen mámleketlik uyımlar hám shólkemlerge bir qatar wazıypalar júkletildi.
Bul wazıypalardıń orınlanıwı boyınsha juwapker ministrlikler hám uyımlardıń málimlemesin Senat komitetleri májilislerinde tıńlaw belgilengen.
Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komitetiniń májilisinde sol haqqında sóz boldı. Nızamnıń orınlanıwın nátiyjeli shólkemlestiriw boyınsha belgilengen wazıypalar kórip shıǵıldı.
Sırtqı isler ministrligi, Investiciyalar, sanaat hám sawda ministrligi hám Turizm komitetiniń usı nızamnıń orınlanıwın nátiyjeli shólkemlestiriw boyınsha málimlemeleri tıńlandı.
Korrupciyalıq jaǵdaylar ishki qadaǵalaw sistemalarınıń jumısı jeterli dárejede ámelge asırılmay atırǵanı hám onıń nátiyjesinde nızamnıń buzılıwına sharayatlar jaratıp berilip atırǵanı atap ótildi.
Senatorlar tárepinen nızamshılıqqa qayshı keletuǵın bunday jaǵdaylar aymaqtaǵı hár bir keńes aǵzasınan óz aldına qoyılǵan wazıypalardı tolıq orınlaw, korrupciyaǵa baylanıslı huqıqbuzarlıqlardı jedellik penen anıqlıw hám olarǵa shek qoyıw, sonday-aq olardıń aqıbetlerin saplastırıw boyınsha nátiyjeli jumıs alıp barıw zárúrligin talap etetuǵını atap ótildi.
Ilajda nızamnıń orınlanıwın nátiyjeli shólkemlestiriw ilajların ámelge asırıw boyınsha komitet qararı qabıl etildi.
Qararǵa muwapıq, ministrlikler hám uyımlarǵa korrupciyaǵa qarsı gúresiw boyınsha alıp barılıp atırǵan jumıslardıń nátiyjeliligin jáne de arttırıw boyınsha kompleksli ilajlar kóriw júkletildi hám tiyisli kórsetpeler berildi.
N.Abduraimova, ÓzA