Prezident Shavkat Mirziyoev 19-dekabr kúni investiciya boyınsha 2024-jıldaǵı nátiyjelerdiń esap-sanaǵın hám kelesi jıldaǵı wazıypalardı dodalaw boyınsha májilis ótkerdi.
2017-jıldan berli mámleketimiz ekonomikasına barlıq dárekler esabınan 188 milliard dollar investiciya kirgizilgen. Sonıń 87 milliard dolları sırttan tartılǵan. Nátiyjede investiciyalardıń jalpı ishki ónimdegi úlesi 30 procentten artıp, turaqlı ekonomikalıq ósiwge tiykar bolmaqta.
Bıyıl ekonomikaǵa kirgizilgen investiciyalar kólemi 1, 3 esege kóbeyip, 36 milliard dollardan arttı. Bulardıń esabınan jıl basınan berli qosımsha 70 trillion sumlıq bahadaǵı 560 iri hám orta joybarlar iske qosıldı. Kelesi jıldan baslap eksporttı jáne 1 milliard dollarǵa arttırıw imkaniyatı payda boldı.
Taraw hám aymaqlarda ashılıp atırǵan imkaniyatlar menen bul nátiyjelerdi jáne de arttırsa boladı.
Májiliste investiciyalar, sanaat hám sawda ministri 2025-jıldıń rejeleri haqqında málimleme berdi.
Kelesi jılı 43 millard dollarlıq investiciyalardı ózlestiriw názerde tutılmaqta. Bul arqalı 300 den aslam iri joybardıń orınlanıwı, importtıń ornın basıwshı 662 jańa ónim islep shıǵarılıwı kútilmekte.
Mámleketimiz basshısı bunıń ushın sırt el investorları menen mánzilli islesip, jáne de qolaylıqlar jaratıw, erisilgen barlıq kelisimlerdi joqarı dárejede ámelge asırıw kerek ekenligin atap ótti.
Sonday-aq, búgingi kúnde 1 mıń 890 joybar boyınsha jumıs alıp barılmaqta. Olardıń orınlanıwın jedellestiriw ushın juwapkerler belgilendi.
Májiliste sırtqı sawda máselelerine de itibar qaratıldı.
Dúnyada baqlanıp atırǵan quramalı jaǵdayda bul óz-ózinen bolmaydı. Еksport-logistika shınjırları qıyınlasıp barmaqta, tiykarǵı eksport bazarlarımızda tayar ónim alıw azaymaqta.
Bunday sharayatta ishki imkaniyatlardı tolıq iske qosıp, ekonomikalıq rawajlanıw pátlerin arttırıw kerek ekenligi atap ótildi.
2030-jılǵa shekem mámleketimizdiń jıllıq eksport kólemin 2 esege arttırıp, 45 milliard dollarǵa alıp shıǵıw maqseti belgilengen. Bul rejedegi investiciyalıq joybarlardı óz waqtında iske qosıp, bahalı ónimler hám xızmetlerdi kóbeytiw, eksport geografiyasın keńeytiwdi talap etedi.
Juwapkerlerge rejelerdiń orınlanıwın turaqlı tallap, jumıstı orınlarda sapalı shólkemlestiriw boyınsha kórsetpeler berildi.
Qaraqalpaqstan xabar agentligi