«Ózbekstan» xalıqaralıq ánjumanlar sarayında Ózbekstan Respublikası Konstituciyası qabıl etilgeniniń 32 jıllıǵı múnásibeti menen saltanatlı bayram ilajı bolıp ótti.

Onda Prezident Administraciyasınıń juwapker xızmetkerleri, Nızamshılıq palatası deputatları, ministrlik hám uyımlar, jámiyetshilik hám ǵalaba xabar qurallarınıń wákilleri qatnastı.
Ilajdıń ashılıwında mámleketimiz basshısı Shavkat Mirziyoevtiń bayram múnásibeti menen xalqımızǵa jollaǵan qutlıqlawın Prezident baspasóz xatkeri Sherzod Asadov oqıp esittirdi.
Prezidenttiń qutlıqlawında bul áyyyam siyasiy-huqıqıy, sociallıq-ekonomikalıq, ruwxıy-aǵartıwshılıq turmısımızda úlken ózgerisler ámelge asırılıp atırǵan tariyxıy bir sharayatta ótip atırǵanı ayrıqsha atap ótildi.
Xaqıyqatında da, ulıwma xalıqlıq referendum tiykarında Konstituciyanıń jańa redakciyada qabıl etilgeni Jańa Ózbekstandı qurıwǵa qaratılǵan keń kólemli reformalar artqa qaytpaytuǵınınıń bekkem huqıqıy kepili bolıp xızmet etpekte.
Konstituciyada Ózbekstannıń bes ústini, yaǵnıy suveren, demokratiyalıq, huqıqıy, sociallıq hám dúnyalıq mámleket ekeni isenimli belgilep qoyıldı, onıń mazmunı túp tiykarınan jeilistirilip, jańa bap hám statyalar menen bayıtıldı.
Atap aytqanda, Konstituciyada mámleketlik qurılıstıń jańa strategiyalıq maqseti- sociallıq mámleket qurıw ekeni belgilep berildi. Sociallıq ádillik hám birlik principleri engizildi. Insannıń huqıqları menen erkinliklerin qorǵawdıń tolıq jańa mexanizmlerin názerde tutatuǵın konstituciyalıq tiykarlar jáne de bekkemlendi.
Jańalanǵan Konstituciyada mámleketimizde insan mápleri áhmiyetli ekenin ózinde sáwlelendirgen «insan – jámiyet – mámleket» principi bekkemlendi. Bul hár qanday máselede, bárinen burın, insan mápi támiyinleniwi zárúrligin ańlatadı.
Qalaberdi, Nızamımızda insan huqıqları ústinligi kepilligin beretuǵın statyalar úsh esegn kóbeytildi. Sonıń ishinde, onda tán alınǵanınday, insannıń huqıqları menen erkinliklerin támiyinlew mámlekettiń joqarı maqseti. Mámleket insan hám puqaranıń Konstituciya hám nızamlarda bekkemlengen huqıqları menen erkinliklerin támiyinleydi.
– Prezidentimizdiń bayram qutlıqlawı hár qashanǵıdaǵıday kóterińki keypiyat beriwi menen birge, onda bildirilgen pikirler bizdi Konstituciya tiykarında jańa sheklerge qaray alǵa barıwımızǵa ilham berdi, – dedi bayram ilajı qatnasıwshısı, Senattıń Qorǵanıw hám qáwipsizlik máseleleri komitetiniń baslıǵı Qutbiddin Burxonov. – Mámleketimiz basshısı atap ótkenindey, biz «Xalıq mámleketlik hákimiyattıń birden-bir dáregi» degen konstituciyalıq principke ámel etken halda, parlament hám jergilikli Keńeslerdiń wákilligin keńeytiw, olardıń jedelligin jáne de arttırıw, nátiyjeli jumıs alıp barıwı ushın zárúr sharayatlardı jaratıw, bir sóz benen aytqanda, olardı haqıyqıy xalıq dawısına aylandırıwǵa qaratılgan reformalarımızda isenimli dawam etemiz. Mine usı pikirler biz, senatorlardıń aldına áhmiyetli wazıypalardı qoydı. Bunnan tısqarı, haqıyqatında da, Konstituciyamız ǵárezsizligimizdi bekkemlew, tınıshlıq hám turaqlılıq, milletleraralıq doslıq hám birlikti saqlawda isenimli kepillik bolıp kelgen hám bunnan soń da usınday bolıp qaladı.
Mámleketimiz basshısı xalıqtıń sociallıq qorǵawǵa mútáj qatlamların qollap-quwatlaw ushın jámi 46,5 trillion sum qarjı jumsalıp, 1 million puqaranı kámbaǵallıqtan shıǵarıw rejelestirilip atırǵanına ayrıqsha áhmiyet bergen.
Bul xalıqtıń mápleri, puqaralardıń konstituciyalıq huqıqların támiyinlewge qaratılgan áhmiyetli ámeliy qádemlerden biri.
Kirip kiyatırǵan 2025-jıl mámleketimizde «Qorshaǵan ortalıqtı qorǵaw hám «jasıl» ekonomika jılı» dep járiyalanǵan. Bul jańalanǵan Bas nızamımızda puqaralardıń ekologiya tarawındaǵı huqıqları konstituciyalıq dárejede belgilenip, mámlekettiń qorshaǵan ortalıqtı qorǵaw, ekologiyalıq teń salmaqlılıqtı saqlawǵa qaratılǵan minnetlemeleriniń orınlanıwına xızmet etedi.

Mine, usınday iygilikli maqsetler bayram ilajında jańlaǵan Watandı jırlaytuǵın, erkinlikti saqlawǵa shaqıratuǵın, huqıq hám minnetlerge ámel etiwge hám tábiyattı saqlawǵa iytermeleytuǵın saxna kórinisleri, nama hám qosıqlarda da óz sáwleleniwin taptı.

Norgul ABDURAIMOVA,
ÓzAnıń xabarshısı