8-dekabr – Ózbekstan Respublikası Konstituciyası qabıl etilgen kún
Konstituciya – nızam menen tártipke salınǵan tiykarǵı qaǵıydalardıń anıq hám ayrıqsha ólshemi bolıwı menen birge, jámiyetlik turmıstıń barlıq tarawlarında baylanıslardıń bekkemleniwi, puqaralardıń tınıshlıǵı menen abadanlıǵın támiyinlewdiń hám mámlekettiń rawajlanıw dárejesiniń negizi bolıp esaplanadı.
Mámleketimizde qabıl etilip atırǵan hár qanday nızam hám nızamnan kelip shıǵatuǵın hújjetler insanıylıq ideyası sińdirilgen Konstituciyamız negizinde qabıl etiledi.
Hár bir mámlekettiń demokratiyalıq ózgesheliklerin sıpatlaytuǵın shártlerdiń biri – bul insan huqıqları menen erkinlikleriniń qorǵalıwı hám kepilleniwi bolıp esaplanadı.
Ózbekstan Respublikası Prezidenti Sh.Mirziyoev «Konstituciya hár bir puqaranıń sanası hám júreginen tereń orın alǵan, olardıń huqıqları menen erkinliklerin tolıq kepilleytuǵın haqıyqıy turmıs nızamına aylanıwı lazım» dep ayrıqsha atap ótkenindey, hújjettiń tiykarǵı baǵdarı – insan hám onıń ómirin biybaha qádiriyat dárejesine kóteriw bolıp esaplanadı.
2023-jıl 30-aprel kúni ѳtkerilgen Ózbekstan Respublikası referendumında ulıwmaxalıqlıq dawıs beriw arqalı qabıl etilgen jańa redakciyadaǵı Bas nızamımız 6 bѳlim, 27 bap hám 155 statyadan ibarat bolıp, onda eń dáslep insan qádiri ayrıqsha negiz etip belgilengen.
Konstituciyamızdı oqıǵan hár bir insan, hújjettiń ulıwma mazmunınan baslap, hár bir statyasına shekem, milliy mánawiyat hám qádiriyatlarımızdı tereń sezinedi. Onda xalqımızǵa tán bolǵan – ádalatlılıq, miyrim-shápáát sıyaqlı joqarı pazıyletler sińdirilgeni oǵada ǝhmiyetli.
Ózbekstan Respublikası Konstituciyasınıń 13-statyasında «Ózbekstan Respublikasında demokratiya ulıwma insanıylıq principlerge tiykarlanadı, oǵan muwapıq insan, onıń ómiri, erkinligi, ar-namısı, qádiri hám basqa da ajıralmas huqıqları joqarı qádiriyat bolıp esaplanadı.
Demokratiyalıq huqıq hám erkinlikler Konstituciya hám nızamlar menen qorǵaladı» dep bekkemlep qoyılǵan.
Insannıń, hár bir puqaranıń nızamlı máplerin qorǵaw bas nızamımızdıń eń ullı maqseti bolıp esaplanadı. Sonnan kelip shıqqan halda, Konstituciyada mámlekettiń tiykarǵı belgileri berilgen bolıp, onda biziń búginimiz hám keleshegimiz sáwlelendirilgen hám xalqımızdıń ásirler dawamında saqlanıp qalǵan úrip-ádet hám dástúrleri, bay tariyxı jámlengen.
Sonıń ushın da Ózbekstan Respublikası Konstituciyasın oqıǵan hár bir insan, ulıwma mazmunınan baslap, hár bir statyasına shekem, milliy mánawiyat hám qádiriyatlarımızdı tereń sezinedi.
Ullı xalqımızǵa tán bolǵan ádalatlılıq, miyrim-shápáát, mártlik hám haqgóylik sıyaqlı ullı pazıyletler usı hújjetten múnásip orın iyelegen.
Sonı ayrıqsha atap ótiw tiyis, ótken dáwir ishinde Ózbekstan Respublikası Konstituciyası dúnyadaǵı eń demokratiyalıq konstituciyalardıń biri sıpatında tán alınbaqta hám ulıwma insanıylıq ideyalar — teńlik, erkinlik, milletler aralıq tatıwlıq sıyaqlı eń ullı ideyalarǵa xızmet etedi.
Hár qanday huqıqıy mámlekettiń qáliplesiwinde, jámiyetlik turmısta Konstituciya hám nızamlar ústinliginiń támiyinleniwi úlken áhmiyetke iye. Ózbekstan Respublikası Konstituciyası tiykarında hár bir puqara joqarı siyasiy bilimge hám huqıqıy mádeniyatqa iye bolıwı, juwapkershilik hám minnetlemelerdi tereń sezinip, nızam hám qaǵıydalarǵa boysınıwı maqsetke muwapıq.
Onda hár bir puqaranıń nızamlı máplerin qorǵaw – tiykarǵı maqset etip belgilengen, joqarı yuridikalıq kúshke iye bolǵan huqıqıy hújjet- Konstituciya tiykarǵı kórsetpe bolıp esaplanadı.

Ruslan Djumamuratov,
Ózbekstan Respublikası Oliy Majlisi
Nızamshılıq palatasınıń deputatı.

Qaraqalpaqstan xabar agentligi