Qońırat rayonı hákimliginiń májilisler zalında 2025-jılda xalıqtıń bántligin támiyinlew hám kámbaǵallıqtı qısqartıw máselelerine baǵıshlanǵan oqıw seminarı bolıp ótti.
Oǵan Qońırat, Moynaq, Qanlıkól, Shomanay rayonlarınıń máhálle jetilikleri menen tiyisli taraw wákilleri qatnastı.
Seminarda Qaraqalpaqstan Respublikası Kámbaǵallıqtı qısqartıw hám bántlik ministriniń orınbasarı A.Qayraddinov, Oraylıq banktiń Qaraqalpaqstan Respublikası bas basqarmasınıń qánigesi A.Azatovlar aymaqlardı rawajlandırıw boyınsha ekonomikalıq kompleks tárepinen ámelge asırılatuǵın wazıypalar, “Drayver” joybarlardı anıqlaw hám Qıtay mámleketiniń tájiriybesin en jaydırıw boyınsha berilgen tapsırmalar tuwralı maǵlıwmatlar berip, mazmun-áhmiyetine keńnen toqtap ótti.
Sonday-aq, “Máhálle jetiligi” tárepinen kámbaǵal shańaraqlar hám jumıssızlardıń dizimin qáliplestiriw, miynet migraciyasınan qaytqan puqaralardı turaqlı túrde monitoring etiw hám olardı dáramatlı miynet penen bánt etiw boyınsha túsindiriw jumısları alıp barıldı.
Qatnasıwshılar qánigelerden ózlerin qızıqtırǵan sorawlarǵa juwap aldı.
Qaraqalpaqstan xabar agentligi.