2025-jıl 1-yanvardan 2028-jıl 1-yanvarǵa shekem tigiw-trikotaj, ayaq kiyim hám bılǵarı-galantereya sanaatı baǵdarlarında óndirislik jumıs alıp barıp atırǵan isbilermenlerge ayırım talaplar tiykarında salıqtan jeńillik beriledi.
Prezidentimizdiń 2024-jıl 27-dekabrdegi PP-229-sanlı pármanına bola, tiyisli ministrlik hám uyımlar bul baǵdarda usı jıldıń fevral ayına shekem nızam joybarın islep shıǵadı.
Atap ótilgenindey, tómendegi barlıq shártlerge bir waqıttıń ózinde juwap beretuǵın isbilermenlik subyektleri ushın payda salıǵı hám ózleriniń xızmetkerleri ushın fizikalıq táreplerden alınatuǵın dáramat salıǵı stavkaları 1 procent etip belgilenedi:
– jámi xızmetkerler sanınıń keminde 15 procenti Sociallıq qorǵawdıń birden-bir reestri hám Kámbaǵal shańaraqlar reestrine kirgizilgen shańaraqlardıń aǵzalarınan ibarat bolǵanda;
-hár ayda hár bir xızmetkerge miynet haqı muǵdarı miynetke haqı tólewdiń eń az muǵdarınıń eki esesinen kem bolmaǵan muǵdarda esaplanǵanda;
– salıq dáwirinde tigiw-trikotaj, ayaq kiyim hám bılǵarı-galantereya ónimlerin realizaciyalawdan túsken ulıwma túsimi jámi tovarlardı (xızmetlerdi) realizaciyalawdan alınǵan dáramattıń keminde 90 procentin quraǵanda,-dep málimleme beredi xabar.uz saytı.
Qaraqalpaqstan xabar agentligi