Búgin, Shomanay rayonındaǵı birinshi mektepte bayram keypiyatı húkim súrmekte.

Rayondaǵı Mektepke shekemgi hám mektep bilimlendiriwi bólimine qaraslı 1-sanlı ulıwma orta bilim beriw mektebi óziniń 55 jıllıq yubiley jasın belgiledi.
Ilajǵa, Qaraqalpaqstan Respublikası Joqarǵı Keńesiniń deputatı U.Jalmenov, rayon hákiminiń orınbasarı A.Bekmuratov, Mektepke shekemgi hám mektep bilimlendiriwi bóliminiń baslıǵı N.Qurbaniyazov, nuraniy ustazlar, muǵallimler hám mektep oqıwshıları qatnastı.
Atap ótilgenindey, elimizde, sonıń ishinde, Shomanay rayonında jas áwladtıń sapalı bilim alıwı, xalqına paydalı insanlar bolıp jetilisiwi ushın barlıq múmkinshilikler iske qosılıp, muǵallim hám ustazlardıń dúnya standartları tiykarında jaslarǵa zamanagóy bilim beriwi ushın barlıq sharayatlar jaratılmaqta. Bul mektep te sońǵı jıllarda jaslarǵa bilim beriw sapasınıń arttırılıwı boyınsha jaqsı nátiyjelerge erisip kelmekte.
Ilajda mektepte kóp jıl ustazlıq etken nuraniylar, mektep pitkeriwshileri de shıǵıp sóylep, jaslarǵa ózleri oqıǵan jıllardaǵı mekteptegi sharayatlardı mısallar menen atap ótip, olarǵa jaratılıp atırǵan sharayatlardan utımlı paydalanıwı, jaqsı bilim alıp kámillikke erisiwin másláhát etip, jaqsı tileklerin bildirdi.
Bayram ilajında mektep tariyxınan kórinisler kórsetilip, oqıwshılardıń kórkem shıǵıwları, muzıkalıq ayaq oyınları tamashagóyler názerine usınıldı.

Qaraqalpaqstan xabar agentligi.