G`a`rezsizligimizdin` 26 jıllıg`ın elimiz u`lken jetiskenlikler menen ku`tip almaqta. A`sirese, Shomanay rayonı ushın bıyılg`ı jıl tabıslı ha`m jemisli boldı, desek qa`telespeymiz. Rayonnan derlik ha`r ku`ni jan`a xabar esitip atırmız.

Ha`mmemizge belgili, Prezidentimiz usı jıl 20-21-yanvar` ku`nleri respublikamızg`a saparı dawamında Shomanay rayonındag`ı 586 orınlıq        1-sanlı, 216 orınlıq 31-sanlı ulıwma bilim beriw mekteplerinin` imaratları go`nergenligin esapqa alıp jan`a imaratlarg`a ko`shiriw, 12, 16, 25-sanlı ulıwma bilim beriw mekteplerine 12×24 ko`lemdegi jan`a sport zalların qurıw, 8-sanlı mektepke shekemgi bilimlendiriw ma`kemesinin` imaratın iri on`law, balalar ha`m jas o`spirimler sport mektebin 2 tipke sa`ykeslendirip rekonstruktsiyalaw (jabıq suw ha`wizi, gimnastika zalı) jumısların alıp barıwdı tapsırg`an edi.

Sol maqsette rayondag`ı 16-sanlı mektep imaratın rekonstruktsiyalaw ushın o`z waqtında tiyisli 606 million sumlıq qarjı ajıratılıp, «Kegeyli qurılıs» JShJ ta`repinen qurılıs jumısları alıp barıldı.

29-avgust ku`ni usı mekteptin` iri on`law jumısları tamamlanıp, onın` ashılıw ma`resimi bolıp o`tti.

Og`an rayon ha`kimiyatının`, ka`rxana ha`m sho`lkemlerdin` basshıları, mektep oqıwshıları, mug`allimler menen oqıwshılardın` ata-anaları, aymaq belsendileri, g`alaba xabar qurallarının` xızmetkerleri qatnastı.

– Mektebimizde jan`adan 12×24 o`lshemdegi sport zalı, 9×18 o`lshemdegi gimnastika zalı, 180 orınlıq ma`jilisler zalı tolıq rekonstruktsiyadan shıg`ıp, mug`allimler ha`m oqıwshılar ushın ha`r qıylı qolaylıqlar jaratıldı. Atap aytqanda, 4 juwınıw, 4 kiyiniw, 1 inventar`,                          1 mug`allimler bo`lmeleri jan`adan salındı. Biz usınday g`amqorlıqları ushın el basshılarımızdan sheksiz minnetdarmız,-deydi mektep direktorı M.Seyfullaev.

Biz rayonnan ja`ne de bir neshe quwanıshlı xabarlardı ku`tip qalamız.

A`.Jiyemuratov,

Qaraqalpaqstan xabar agentliginin` xabarshısı.