Watanımız g`a`rezsizliginin` 26 jıllıg`ı aldınan

 «Bu`gingi ku`nde Prezidentimizdin` basshılıg`ında qala ha`m rayonlarımız u`lken do`retiwshilik maydanına aylanıp barmaqta. A`sirese, elimizdin` tariyxına, ko`rkem-o`nerine, ma`deniyatına qaratılıp atırg`an joqarı itibar xalqımızdın` ruwxıy du`n`yasın bayıtıwda ayrıqsha a`hmiyetke iye bolmaqta. Elimiz g`a`rezsizliginin` jigirma altı jıllıq bayramı aldınan ja`ne bir tariyxıy waqıyanın` gu`wası bolıp turmız»… Bay tariyxımızdan, ma`deniyatımızdan so`yleytug`ın, ata-babalarımızdan kiyatırg`an biybaha miyraslardı o`zinde ja`mlegen qaraqalpaq ma`mleketlik ko`rkem o`ner muzeyinin` jan`a ekspozitsiyasının` ashılıw ma`resimi usınday so`zler menen baslandı.

Ma`resimdi Qaraqalpaqstan Respublikası Joqarg`ı Ken`esinin` komitet baslıg`ı D.Qurbaniyazov ashtı ha`m alıp bardı.

Ilajda Qaraqalpaqstan Respublikası Joqarg`ı Ken`esinin` Baslıg`ı M.Erniyazov, O`zbekistan Respublikası Ma`deniyat ministrinin`  orınbasarı K.Xakimova ha`m basqalar shıg`ıp so`ylep, muzey ata-babalarımızdan miyras qalg`an materiallıq ha`m ruwxıy baylıqlardı qa`sterlep-saqlawda, olardı keleshek a`wladqa jetkeriwde ayrıqsha orın iyeleytug`ının, bu`gingi ku`nde bul jerde og`ada bahalı eksponatlar, sonın` ishinde, xalqımızdın` do`retiwshiligi, ko`rkem o`neri menen baylanıslı bay eksponatlar ja`mlengenin atap o`tti. Muzey direktorı G.Izentaeva imarattın` sapalı qurıp pitkeriliwine mu`na`sip u`les qosqan barlıq ma`keme ha`m sho`lkemlerge, qolı gu`l qurılısshılarg`a teren` minnetdarshılıq bildirdi.

– Biz haqıyqatında da baxıtlı insanlarmız, sebebi, usınday biybaha muzey bizin` qalamızda jaylasqan, – deydi A`jiniyaz atındag`ı No`kis ma`mleketlik pedagogikalıq institutının` studenti U.Paxratdinova. – Bul jerde xalqımızdın` orta a`sirlerge ta`n bolg`an mu`sinshilik, zergerlik, toqımashılıq, gu`lalshılıq ha`m basqa da biybaha do`retiwshilik jumısları o`z ko`rinisin tapqan. Sonlıqtan-da, bul muzey du`n`ya xalıqları ta`repinen «Sahradag`ı Luvr», «Qumlar ishindegi ga`whar» ha`m «Du`n`nın` en` jaqsı muzeylerinin` biri» dep bahalanıp kelmekte.

Ekspozitsiya zalları zamanago`y ko`rinistegi sulıw imarattın` ekinshi ha`m u`shinshi qabatında jaylasqan bolıp, 500 den aslam Rossiya, O`zbekistan, Qaraqalpaqstan xudojniklerinin` jivopis`lik, grafikalıq, mu`sinshilik ha`m qollanba qol o`neri do`retpeleri qoyılg`an. Ekinshi qabatta qaraqalpaqstanlı xudojniklerdin` zamanago`y do`retpeleri respublikamız su`wretlew o`nerinin` 1960-1990-jıllar aralıg`ında qa`liplesiwi ha`m rawajlanıw tariyxı, do`retiwshilik o`zgesheligi haqqında so`z etedi. U`shinshi qabatta 20-30-jıllardag`ı o`zbekstanlı xudojniklerdin`, sonın` menen birge, XX a`sir orıs xudojniklerinin` jumısları jaylasqan.

Bul jerge kelgenler ma`deniy turmısımızdag`ı mazmunlı ha`m itibarg`a ılayıq jan`alalıqlardın` gu`wası bolatug`ını so`zsiz.

M.IGILIKOVA,

Qaraqalpaqstan xabar agentliginin` xabarshısı