Bala ku`lse, a`lem – gu`listan. Paytaxtımızda kishkenelerdin` mazmunlı dem alıwı ushın arnalg`an orınlar balalar shadlıg`ı menen ele de payızlı. Balalardın` shu`ldirlep so`ylewi, ko`zlerindegi quwanısh ushqınları, shın ju`rekten shaqalaq atıp ku`lgeni du`n`yanı go`zzallıqqa bo`leydi. Paytaxtımızdag`ı A`mir Temur atındag`ı ma`deniyat ha`m dem alıw bag`ında burın ko`pten paydalanılmay atırg`an orında qurılıs abadanlastırıw jumısları alıp barılıp, balalarg`a bayram baslandı. Sebebi, bul jerde jan`a attraktsionlar iske tu`sti.

No`kis qalalıq abadanlastırıw  basqarması menen birgelikte ma`deniyat ha`m dem alıw bag`ında 21 mın` metr kvadrat maydang`a gazon egilip, suw sebiw qurılmaları ornatıldı, ishki jollar islendi, otırg`ıshlar menen u`skenelendi. 20 dan aslam attraktsion qurıldı. Qurılıslardı «Davlatnazor oromgohi» juwapkershiligi sheklengen ja`miyeti a`melge asırdı.

– Biz de perzentlerimiz benen keshki seyilge shıqtıq, ha`mme shad. Ha`tte ele jasqa tolmag`an Rayana qızım da ju`regi sha`wkildep, qıshqırıqlarg`a u`les qosıp, qolların ko`teriwden sharshamaydı, – deydi 23-kishi rayonnın` turg`ını Aynura Qurbanova. Bul orınnın` u`yimizge jaqın aymaqta ashılıp atırg`anı ba`rinen de maqul, ko`lik izlep, qosımsha shıg`ın, waqıt sarplap ju`rmeymiz. Sawda orınları, otırg`ıshlar, shıg`ındı qutıları bar. En` zamanago`y, basqasha ko`rinistegi attraktsionlar balalarımızg`a ju`da` qızıqlı. Onın` u`stine bu`gin attraktsionlar perzentlerimiz ushın biypul xızmette boldı.

Payızlı ma`kannın` ashılıw ma`resimine Qaraqalpaqstan Respublikası Ministrler Ken`esinin` Baslıg`ı Q.Sariev, No`kis qalası ha`kimi wazıypasın waqtınsha  atqarıwshı S.Nag`metov ha`m basqalar shıg`ıp so`ylep, bunday iygilikli islerdi elimizde a`melge asırılıp atırg`an reformalardın` a`meliy na`tiyjesi sıpatında atap o`tti.

M.IGILIKOVA,

Qaraqalpaqstan xabar agentliginin` xabarshısı.

G.Aynazarova, Jurnalistika qa`nigeligi 2-kurs studenti (foto)