Paytaxtımızdaǵı 18-sanlı ulıwma orta bilim beriw mektebinde 27-28-aprel kúnleri «Bilimler bellesiwi»niń Qaraqalpaqstan Respublikalıq basqıshı bolıp ótpekte.

Búgin saat 11:00 de huqıqtanıw, ekonomika, tariyx pánleri boyınsha onlayn-test, ximiya, biologiya, fizika pánlerinen jazba hám laboratoriya jumısları alıp baslanadı. Ximiya, biologiya, fizika hám qalǵan pánler boyınsha onlayn-test erteń usı waqıtta alınadı. Bellesiwdiń qala hám rayonlararalıq basqıshında jeńiske erisken 403 oqıwshınıń 76 balldan joqarı ball toplaǵan otızı sensor ekranlı zamanagóy qol telefonına iye boladı.

Eki jıldan berli tek 7-8-klasslar arasında ótkerilip kiyatırǵan «Bilimler bellesiwi»niń ádalatlı ótiwin támiyinlew ushın 150 tájiriybeli oqıtıwshıdan dúzilgen tóreshiler quramı bekitilgen.

Hár kúni bellesiwden soń oqıwshılardıń bos waqtında paytaxtımızdaǵı Savickiy atındaǵı Qaraqalpaq mámleketlik kórkem óner muzeyine sayaxatı shólkemlestirilmekte. Bilimlendiriw ministrliginiń maǵlıwmatına qaraǵanda, respublikamızdıń uzaq rayonlarınan kelgen oqıwshılar menen tóreshilerdiń jasawı hám awqatlanıwı ushın da barlıq sharayatlar jaratılǵan bolıp, 250 orınlıq jataqxana, úsh mezgil ıssı awqat shólkemlestirilgen.

M.PIRNAZAROVA,

Qaraqalpaqstan xabar agentliginiń xabarshısı.