13-aprel kúni Jaslar orayında Ózbekstan jaslar awqamı Qaraqalpaqstan Respublikalıq Keńesi tárepinen shólkemlestirilgen «Jas dóretiwshiler» klubınıń proza baǵdarı jumısların jáne de jetilistiriw maqsetinde talantlı jaslar arasında seminar-trenig ótkerildi.
Oǵan paytaxtımızdaǵı I.Yusupov atındaǵı qánigelestirilgen mektep-internatınıń jas dóretiwshi oqıwshıları, joqarı oqıw orınlarınıń sonday-aq Taqıyatas, Xojeli rayonlarınan kórkem ádebiyattıń proza tarawına qızıǵatuǵın talantlı student-jaslar qatnastı.
-«Proza aytadı: – poeziya meni tolqındandıradı, dramaturgiya háreketke keltiredi, sın dúzeydi, awdarma dúnyaǵa tanıtadı», – degen edi. «Jas dóretiwshiler» klubı usı jıl 16-fevral kúni dúzilip, ol bes baǵdarda-poeziya, proza, dramaturgiya, sın hám awdarma boyınsha jumıs alıp barmaqta, – deydi Zulfiya atındaǵı mámleketlik sıylıqtıń lauretı, proza baǵdarınıń sárdarı Qumar Begniyazova.
Ilajda Qaraqalpaqstan xalıq jazıwshısı, «Qaraqalpaqstan sportı» gazetasınıń bas redaktorı Allanazar Ábdiev, «Jetkinshek» gazetasınıń bólim baslıǵı Yaqıpbay Ájimovlar jaslarǵa ádebiyat teoriyası, prozanıń ózine tán ózgeshelikleri, búgingi kúnde prozadaǵı erisilgen jetiskenlikler menen kemshiliklertuwralı keń túrde maǵlıwmat berdi.
Jaslar ózlerin qızıqtırǵan sorawlarǵa juwap aldı, sonday-aq, gúrrińleri oqılıp, oǵan pikir-usınıslar bildirildi.
Qaraqalpaqstan xabar agentligi