Ájiniyaz atındaǵı Nókis mámleketlik pedigogikalıq institutında shólkemlestirilgen Ilimiy keńes ilimiy dáreje beriw ushın dáslepki májilisin ótkerdi. Májiliste alıp barılǵan izertlewlerdiń juwmaǵı dodalanıp, Ilimiy Keńes sheshimi menen tastıyıqlandı hám institut tariyxında birinshi márte pedagogika ilimleri boyınsha filosofiya doktorı ilimiy dárejesi berildi.
– Qaraqalpaqstan Respublikası tariyxında Pedagogika ilimi tarawı boyınsha birinshi ret ilimiy dárejeler beretuǵın ilimiy Keńestiń shólkemlestiriliwi izertlew jumısları menen shuǵıllanıp atırǵan jas izleniwshilerge imkaniyatlar esigin ashıp berdi, – deydi pedagogika ilimleriniń doktorı, professor Óserbay Álewov. – Sebebi, Qaraqalpaqstanda pedagogika ilimi óziniń kóp jıllıq pedagogikalıq tariyxına hám ornına iye. Xalıq bilimlendiriw tarawında pedagogika iliminiń jetiskenlikleri tiykarında jas áwladqa tálim-tárbiya beriw, sonday-aq, ilimniń sońǵı jańalıqları hám jetiskenlikleri menen qurallandırıp barıwda Ilimiy keńestiń áhmiyeti oǵada úlken.
Ilimiy Keńestiń dáslepki májilisinde Nókis mámleketlik pedagogikalıq institutı janındaǵı Xalıq bilimlendiriw xızmetkerlerin qayta tayarlaw hám olardıń qánigeligin arttırıw aymaqlıq orayınıń aǵa oqıtıwshısı Gúlbaxar Abılova «Muzıka tálimi baǵdarında informatikanı oqıtıwdıń ilimiy-metodikalıq tiykarların jetilistiriw» temasındaǵı dissertaciyasın qorǵadı. Onıń usı dissertaciya teması boyınsha Ózbekstan Respublikası Ministrler Kabineti janındaǵı Joqarı Attestaciya komissiyası tárepinen doktorlıq dissertaciyalardıń tiykarǵı ilimiy nátiyjelerin basıp shıǵarıw ushın usınıs etilgen ilimiy basılımlarda 24 ilimiy-metodikalıq jumısı baspadan shıqqan.
G.Abılovanıń dissertaciya jumısınıń barlıq hújjetleri pedagogika ilimleri boyınsha filosofiya doktorı (PhD) ilimiy dárejesin alıw ushın qoyılǵan talaplarǵa tolıq juwap beredi, dep tabıldı.
Qaraqalpaqstan xabar agentligi.