2018–2019-jıllarda Qaraqalpaqstan Respublikasında sanaat, awıl-xojalıǵı hám xızmet kórsetiw tarawlarında ulıwma nırqı 4,5 trillion sumlıq 313 joybardıń ámelge asırılıwı rejelestirilgen. Nátiyjede 6847 puqara turaqlı jumıs ornına iye boladı.
Bul maǵlıwmatlar Qaraqalpaqstan Respublikası Joqarǵı Keńesindegi Ózbekstan liberal-demokratiyalıq partiyasınıń frakciya májilisinde Ekonomika ministrliginiń bas qánigesi U.Tilewniyazovtıń jasaǵan bayanatınan jazıp alındı.
Májiliste partiyanıń 2018-jılǵı rejesine muwapıq, Qaraqalpaqstan Respublikası Oraylıq bank Bas basqarması, Qarjı hám Ekonomika ministrlikleri wákilleri óz esapların usındı. Ótken jıl dawamında isbilermenlik subektleri ushın ajıratılǵan kredit muǵdarları hám kommerciyalıq bankler tárepinen isbilermenlikti qollap-quwatlaw ushın berilip atırǵan jeńillikli kreditler, sonday-aq, bıyılǵı jıl ushın mólsherlengen kredit ajıratıwdıń finanslıq máseleleri, aymaqlardı sociallıq-ekonomikalıq rawajlandırıwǵa qaratılǵan joybarlardıń ámelge asırılıwı ushın belgilengen wazıypalar, isbilermenlik ushın jaratılıp atırǵan sharayatlar boyınsha mashqalalar deputatlar arasında keń túrde talqılandı.
Respublikamızdıń sanaat tarawında 4 trillion sumlıq investiciyalardı ózlestiriw arqalı 175 joybar, xızmet kórsetiw hám servis salasında 200 milliard sumlıq investiciyanıń ózlestiriliwi nátiyjesinde 96 joybar, sonday-aq, awıl-xojalıǵı tarawında 265,6 milliard sumlıq investiciyalardı ózlestiriw arqalı 42 joybar ámelge asırılıp, nátiyjede 7 mıńǵa shamalas puqaranı jumıs penen támiyinlew mashqalası sheshiletuǵını atap ótildi.
– Prezidentimiz Sh.Mirziyoevtiń 2017-jıl 12-iyul kúngi «Parlamentimiz haqıyqıy demokratiya mektebine aylanıwı, reformalardıń shólkemlestiriwshisi hám tiykarǵı orınlawshısı bolıwı kerek» atamasındaǵı bayanatında atap ótkenindey, isbilermenlerdiń máplerin hár tárepleme qollap-quwatlaw maqseti menen jumıs alıp barıp atırǵan ÓzLiDeP Ekonomika, Qarjı ministrlikleri, Investiciya boyınsha mámleketlik komitetleri ústinen nátiyjeli parlamentlik hám deputatlıq qadaǵalaw alıp barmaqta, – deydi ÓzLiDeP Qaraqalpaqstan Respublikası Keńesi baslıǵı, partiyanıń Qaraqalpaqstan Respublikası Joqarǵı Keńesindegi ÓzLiDeP frakciyası baslıǵı S.Turmanov. – Qadaǵalawdıń nátiyjesi búgingi májiliste óz kórinisin taptı. Ótken jılı 2016-jılǵa salıstırǵanda isbilermenlikti qollap-quwatlawǵa qaratılǵan kreditler 1,3 esege artqan. Yaǵnıy usı baǵdarda berilgen kredit 861,4 milliard sumdı, sonnan mikrokreditler kólemi 206,2 milliard sumdı quraǵan. Al, bıyılǵı jılı kem támiyinlengen shańaraqlardıń bántligin támiyinlew maqsetinde 13 mıń 962 shańaraqqa 197,1 milliard sum muǵdarında jeńillikli mikrokreditler ajıratıladı.
Qaraqalpaqstan xabar agentligi.