Ózbekstan Respublikası Oraylıq banki Qaraqalpaqstan Respublikası Bas basqarmasında Ózbekstan Respublikası Prezidentiniń 2018-jıl 23-marttaǵı «Bank xızmetleriniń ǵalabalıǵın arttırıw boyınsha qosımsha ilajlar haqqında»ǵı qararınıń mazmun–mánisin keń jámiyetshilikke, sonıń ishinde, isbilermenlerge jetkeriwge baǵıshlanǵan oqıw-seminarı bolıp ótti.
Ilajda Ózbekstan Respublikası Oraylıq banki Qaraqalpaqstan Respublikası Bas basqarması baslıǵınıń orınbasarı Mars Mamutov, Ózbekstan Respublikası Oraylıq banki departament baslıǵınıń orınbasarı Shuxrat Karimov, akcionerlik-kommerciyalıq «Turanbank» baslıǵınıń orınbasarı Oleg Kim shıǵıp sóylep, Prezidentimizdiń qararınıń mazmun-mánisi, elimizde bank sistemasında ámelge asırılıp atırǵan reformalar, jańadan engizilgen bank xızmetleri, xalıqqa hám jeke tártiptegi isbilermenlerge jaratılǵan imkaniyatlarǵa toqtap ótti.
Atap ótilgenindey, búgingi kúni barlıq tarawlar sıyaqlı bank sistemasında da keń kólemli reformalar ámelge asırılmaqta. Atap aytqanda, kommerciyalıq banklerde bank xızmetlerin kórsetiwdiń bazar mexanizmlerin engiziw, olardıń túrlerin keńeytiw, xalqımız hám isbilermenler ushın qarjı ashıq-aydınlıǵın támiyinlew máselelerine ayrıqsha itibar qaratılmaqta. Xalıq ushın valyuta almastırıw ámeliyatların ámelge asırıwdı jeńilletetuǵın jańa bank xızmetleri engizildi, jeke tártiptegi isbilermenler tárepinen shet el valyutasın satıp alıw ushın imkaniyatlar jaratıldı.
Sonıń menen birge, bank xızmetleri tutınıwshılarınıń huqıqları menen nızamlı máplerine, ásirese, aymaqlarda ámel etiw jáne qarjı ashıq-aydınlıǵın keńeytiw, sonday-aq, xızmet kórsetiw mádeniyatı hám bank sistemasına bolǵan isenimdi bunnan bılay da arttırıwda bir qatar mashqalalar da orın almaqta. Joqarıda atap ótilgen qarar usı mashqalalardı saplastırıwǵa, bank xızmetleri tutınıwshılarınıń huqıqların qorǵawdı támiyinlew mexanizmlerin bunnan bılay da jetilistiriw hám innovaciyalıq rawajlanıwdıń tendenciyaların esapqa alǵan halda qarjı ashıq-aydınlıǵı dárejesin arttırıwǵa xızmet etedi.
Usı qararǵa muwapıq, bank xızmetleriniń ǵalabalıǵın arttırıwdı támiyinlew hám bank xızmetleri tutınıwshılarınıń huqıqların qorǵaw Ózbekstan Respublikası Oraylıq bankiniń tiykarǵı wazıypalarınan biri etip belgilendi. Onıń orınlanıwın támiyinlew máseleleri tikkeley Ózbekstan Respublikası Oraylıq bankiniń quramlıq strukturasında shólkemlestirilgen bank xızmetleri tutınıwshılarınıń huqıqların qorǵaw xızmetine júkletildi. Bul wazıypanı atqarıwda tiykarǵı itibar, bank sistemasında sistemalı kemshilikler hám bank xızmetleri tutınıwshılarınıń huqıqları buzılıwınıń aldın alıwǵa, buǵan jol qoyǵan kredit shólkemlerine juwapkershilik ilajların kóriwdi támiyinlewge, olardıń buzılǵan huqıqların tiklewde másláhát beriwge hám kómeklesiwge, qarjı ashıq-aydınlıǵı dárejesin jáne tutınıwshılardıń sawatlılıǵın arttırıwǵa qaratıladı.
-Bul ilajdı ótkeriwdegi maqset, Prezidentimizdiń qararınıń mazmun-mánisin keń jámiyetshilikke jetkeriwden ibarat,-deydi Ózbekstan Respublikası Oraylıq banki Qaraqalpaqstan Respublikası Bas basqarmasınıń basqarma baslıǵı Azamat Abdikarimov.-Aldaǵı waqıtları bunday oqıw-seminarın respublikamızdıń barlıq rayonlarında ótkeriwdi rejelestirip otırmız.
Ilaj qatnasıwshıları ózlerin qızıqtırǵan bir qatar sorawlarǵa juwap aldı.
D.ABIBULLAEV,
Qaraqalpaqstan xabar agentliginiń xabarshısı.