Ózbekstan Respublikası Prezidentiniń 2017-jıl 19-iyundegi PP-5087-sanlı pármanı tiykarında respublikamızdıń barlıq qala hám rayonlarında Ózbekstan Sawda-sanaat palatası Qaraqalpaqstan Respublikalıq basqarmasınıń Isbilermenlikke kómeklesiw orayları shólkemlestirilip, olardıń jetewi «bir ayna» imaratlarınıń ishinde, qalǵanı olarǵa jaqın orınlarda jaylasqan.

Basqarma tárepinen usı jıl úsh ay dawamında isbilermenlikti hám investiciyalıq ortalıqtı jaqsılaw maqsetinde respublikamızdaǵı 151 bos turǵan yamasa tolıq quwatlılıqta paydalanılmay atırǵan imaratlar hám jer maydanları xatlawdan ótkerilgen. Olardan paydalanıw boyınsha ulıwma bahası 20 milliard 271 million sumlıq 151 dáslepki biznes joybarlar islep shıǵılǵan. Sonnan, 5 milliard 515 million sumı (27%i) isbilermenlerdiń óz qarjıları, 14 milliard 756 million sumı (73%i) bank kreditleri esabınan ámelge asırıladı.

– Bul jerlerdegi isbilermenlerge kórsetiletuǵın: biznes-reje tayarlaw, huqıqıy másláhátler beriw, elektron-sanlı qol tańba alıwǵa kómeklesiw, esap betin ashıw ushın hújjetler tayarlap beriw sıyaqlı xızmetler biypul túrde ámelge asırılmaqta,-deydi Qaraqalpaqstan sawda-sanaat palatasınıń baslıǵı Rasul Zarikeev. – Al, shólkemlestiriwshilik hújjetlerin, mór hám shtamp eskizlerin tayarlaw, shet el kompaniyaları menen kelisimge qol qoyısıwǵa kómeklesiw, salıq jáne statistikalıq esapların elektron túrinde jiberiw boyınsha kórsetiletuǵın xızmetlerge aqsha tólenedi.

Usı jıldıń úsh ayı dawamında respublikamız boyınsha isbilermenlikke kómeklesiw orayları tárepinen 4454 isbilermenlik subektine hám isbilermenlik jumısın baslamaqshı bolǵan 305 puqaraǵa xızmet kórsetilgen.

– Isbilermenlerdi oqıtıw hám kadrlardı tayarlaw tarawında da bir qatar jumıslar ámelge asırılmaqta,-deydi R.Zarikeev. – Basqarma janınan usı maqsette «Qaraqalpaq biznes tálim» oqıw orayı shólkemlestirilgen bolıp, usı jıl 3 ay ishinde ondaǵı 5 oqıw kursında 78 isbilermen oqıtıldı. Al, Ózbekstan Respublikası Menshiklestirilgen kárxanalarǵa kómeklesiw hám básekilikti rawajlandırıw boyınsha mámleketlik komiteti menen birgelikte shólkemlestirilgen 12 oqıw kursında 230 isbilermen bilim aldı.

Usı biznes joybarlardıń ámelge asırılıwı nátiyjesinde 700 ge shamalas jańa jumıs orınlarınıń shólkemlestiriliwi kútilmekte.

Á.Jiyemuratov,

Qaraqalpaqstan xabar agentliginiń xabarshısı.