Oraylıq bank jańa kupyura shıǵarıwdı rejelestirip atırǵanlıǵın tastıyıqladı, biraq onıń qashan shıǵarılıw sánesi belgisiz, dep jazadı Kun.uz «Xalq swzi» saytına silteme berip.

Yanvar ayınıń basında Oraylıq bank 2018-jıldaǵı wazıypalar qatarında mayda kupyuralardı basqıshpa-basqısh teńge pullarǵa almastırıw hám joqarı nominaldaǵı banknotalardıń shıǵarılıwın sanap ótken edi.

Mart ayınıń ortalarında Senat 50, 100, 500 sum nominaldaǵı jańa úlgidegi teńge pullar, sonday-aq, 200 sumlıq jańa teńge puldı shıǵarıw usınısın maqulladı. Biraq, banknota haqqında sóz bolmaǵan. Usı múnásibet penen Spot basılımı Oraylıq banke múrájat etti hám Oraylıq bank baslıǵınıń birinshi orınbasarı Timur Ishmetovtan juwap aldı.

Juwapta 2018-jıl dawamında joqarı nominaldaǵı banknotanı aylanısqa shıǵarıw rejelestirilip atırǵanı málim etilgen.

Onda, sonday-aq, ornatılǵan tártipte banknotalardıń úlgileri hám olardıń dizaynleri Oliy Majlis Senatı Keńesi menen birgelikte Oraylıq bank tárepinen tastıyıqlanıwı, jańa kupyuranı shıǵarıw bir qansha shólkemlestiriw-texnikalıq ilajlardı ámelge asırıwdı talap etiwi atap kórsetilgen.

Oraylıq bank házirgi waqıtta jańa kupyuralar shıǵarılıwınıń anıq sánesi qashan ekenligi boyınsha málim ete almaytuǵınlıǵı aytılǵan. Múddetler anıqlanǵanda, bul maǵlıwmat Oraylıq banktiń rásmiy saytında járiyalanadı.

Qaraqalpaqstan xabar agentligi