«Qaraqalpaq ádebiyatı» gazetası ótken jılı sentyabr ayında Ózbekistan Respublikası Oliy Majlisi janındaǵı mámleketlik emes kommerciyalıq emes shólkemlerdi hám puqaralıq jámiyetiniń basqa da institutların qollap-quwatlaw jámiyetlik fondı tárepinen qarjılandırılǵan «Gózzal hám biytákirarımsań, muqaddes Watanım, janım saǵan pidá, Ózbekistanım! tańlawı nominaciyası tiykarında «Jas áwladlardı Watan súyiwshilik ruwhında tárbiyalawda ádebiyattıń roli» atamasındaǵı joybarı menen mámleketlik grant jeńimpazı bolǵan edi.
Bul joybar Qaraqalpaqstan Jazıwshılar awqamı, Qaraqalpaqstan Respublikası Ministrler Keńesi, Orta arnawlı kásiplik bilimlendiriw basqarması hám Qaraqalpaqstan Respublikası Xalıq bilimlendiriw ministrligi menen birlikte shólkemlestirilgen bolıp, onıń tiykarǵı maqseti – ósip kiyatırǵan jas áwladtıń sanasında óz eliniń, tuwılǵan jeriniń tariyxı, xalqımızdıń bay ádebiyatı menen mádeniyatınıń búgingi erisip atırǵan jetiskenlikleri boyınsha pán oqıtıwshılarınıń is-tájiriybesin jetilistiriw arqalı ǵárezsiz elimizdiń tabısların jáne de bekkemlewge, jaslarda ana-Watanǵa degen súyispenshilik sezimlerin tárbiyalawǵa erisiw bolıp tabıladı.
Jaqında usı joybardıń juwmaqlanıwına baylanıslı ánjuman bolıp ótti.
Ilajdı senator, joybar baslıǵı G.Annaqlıcheva alıp bardı.
Oǵan ádebiyatshı ilimpazlar, jazıwshılar, shayırlar, respublikamızdıń barlıq qala hám rayonlarındaǵı ulıwma bilim beriw mektepleri menen kásip óner kolledjleri hám akademiyalıq liceylerdiń qaraqalpaq, ózbek, orıs tili pán oqıtıwshıları, puqaralıq jámiyeti institutların monitoring etiw biyǵárez institutınıń qánigeleri hám ǵalaba xabar qurallarınıń wákilleri qatnastı.
Ilajda pán oqıtıwshılarınıń «Watan teması-baslı ideyamız», «Ana-Watan túsinigi egiz hám muqaddes», «Ana Watandı súyiwdi jaslar sanasına jetkeriw-baslı maqsetimiz», «Watandı súyiw iymannandur» atamasındaǵı bayanatları tıńlandı.
Ánjuman juwmaǵında joybarda belsendilik kórsetken bir qatar oqıtıwshılar shólkemlestiriwshiler tárepinen bahalı sawǵalar menen sıylıqlandı.
Tárbiya SEYTNAZAROVA,
Qaraqalpaqstan xabar agentligi xabarshısı