Respublikamızdaǵı 19 mádeniyat hám dem alıw baǵınıń birewi «Ózbekistan temir jolları» balansında, birewi «Beruniy áwladları» fondında, ekewi jeke menshik kárxanaǵa, qalǵan 15 baǵ qala hám rayon hákimlikleri menen abadanlastırıw basqarmalarına bekitilgen.
Búgingi kúnge shekem Tórtkúl, Beruniy, Ámiwdárya, Qońırat, Nókis, Ellikqala rayonları hám Nókis qalasındaǵı mádeniy dem alıw baǵları jańadan qurılıp, ayırımları iri ońlawdan shıǵarılıp, zamanagóy attrakcionlar, balalardıń oyın úskeneleri, xızmet kórsetiw shaqapshaları hám basqa da sawda dúkanları ashılıp xalıqqa xızmet kórsetpekte.
Atap aytqanda, Moynaq rayonındaǵı Mádeniyat hám xalıqtıń dem alıw baǵına «Xalıq banki» rayonlıq filialı tárepinen úsh túrdegi balalar attrakcionların satıp alıw ushın 100 mln. kredit ajıratılǵan. Dem alıw baǵında «Buynıy» korabli hám «Hásiretli ana» háykeli ornatıldı.
Qońırat rayonındaǵı «Temir jolshılar» Mádeniyat hám xalıqtıń dem alıw baǵında «Golden Baby Shaxrux» JShJ baǵı shólkemlestirilgen bolıp, ulıwma maydanı 18 gektardı quraydı. Onda úsh attrakcion, 5 kóklemzarlıq, jazǵı balalar shomılıw basseyni, futbol maydanshaları, TIR, sawda shaqapshaları, amfiteatr, onlaǵan balalar oyın attrakcionları xızmet kórsetpekte.
Tórtkúl rayonındaǵı «Jaslıq» Mádeniyat hám xalıqtıń dem alıw baǵı 2013-jılı modernizaciyalandı. Baǵda jámi 15 attrakcion bolıp, bir jasalma qaplamalı mini futbol, 350 sayamanlı terek, hár qıylı gúller, 30 otırǵısh hám 40 dana túngi jaqtılındırıw úskeneleri ornatıldı.
Beruniy rayonındaǵı Mádeniyat hám xalıqtıń dem alıw baǵına «Astrobiya» JShJ tárepinen 450 sayamanlı terekler, 1000 túp roza gúl, 300 túp Yasin terekleri egildi. Baǵda 25 orınlıq, 40 túngi jaqtılandırıw úskeneleri ornatıldı.
Ámiwdárya rayonındaǵı «Manǵıt» Mádeniyat hám xalıqtıń dem alıw baǵı 2013-jılı modernizaciyalanıp, «Qushaev Raim» jeke menshik kárxanası tárepinen qayta islengen. Bul jerde de attrakcionlar, dem alıw orınları, awqatlanıw shaqapshaları, cuw basseyni bar. Búgingi kúnde abadanlastırıw jumısları alıp barılmaqta.
Al, Ta[takópir rayonında «Shańaraqlıq isbilermen» Sabur Abdikarimov «Xalıq banki»niń rayonlıq filialı tárepinen 147 mln. 40 mıń sum kredit alıp, baǵdıń abadanlasıwına hám kórkeyiwine óz úlesin qospaqta.
Xalıqtıń kewilli dem alıp, sharshaǵanın shıǵaratuǵın bunday payızlı jerlerdi qayta islew, iri ońlaw, abadanlastırıw jumısları nátiyjeli dawam etpekte.

Tárbiya SEYTNAZAROVA,
Qaraqalpaqstan xabar agentligi xabarshısı