Búgin paytaxtımızda Nawrız ulıwmaxalıqlıq bayramına arnalǵan marafon bolıp ótti. Onda respublikamızdıń barlıq qalaları menen rayonlarınan kelgen 3 mıńǵa shamalas jámlespegen jaslar, háwesker sportshılar 2018 metr, 3 hám 21 kilometr aralıqlarǵa juwırıw boyınsha bellesti.
Berdaq atındaǵı Qaraqalpaq mámleketlik universiteti janındaǵı 3-sanlı akademiyalıq liceyden, «Hásiretli ana» esteliginen, «Taslaq» elatında jaylasqan kishi aylanbadan start berilgen marafonnıń tiykarǵı shólkemlestiriwshisi Ózbekstan Jaslar awqamı Qaraqalpaqstan Respublikalıq Keńesi bolıp, ilajǵa Qaraqalpaqstan Respublikası Mádeniyat hám Ishki Isler ministrlikleri, Puqaralardıń ózin-ózi basqarıw uyımları jumısların muwapıqlastırıw boyınsha Qaraqalpaqstan Respublikalıq Keńesi sıyaqlı bir qatar shólkemler qáwenderlik etti.
2018 metr aralıqta er balalar arasında birinshi orınǵa Shaxzod Azadov, ekinshi orınǵa Shaxrux Allambergenov, úshinshi orınǵa Uluǵbek Kamalov ılayıq kórildi. Qız balalar arasında birinshi orındı Mariya Enzakova, ekinshi orındı Axmediya Erejepbaeva, úshinshi orındı Ulzada Nagimova jeńip aldı.
3 kilometr aralıqta er balalar arasında birinshi orın Quwatjan Ábdimuratovqa, ekinshi orın Nawrız Keńesovqa, úshinshi orın Azim Matekovqa nesip etken bolsa, qız balalar arasında Biybimáryam Joldasbaeva úshinshi orınǵa, Natalya Nazarova ekinshi orınǵa hám Zuxra Sadirova birinshi orınǵa ılayıq dep tabıldı.
21 kilometr aralıqta er balalar arasında Jamshid Egamberdiev birinshi orındı, Shonazar Latipbaev ekinshi orındı, Íqlas Pirimbetov úshinshi orındı jeńip aldı. Al, qız balalar arasında usı aralıqta birinshi orın Asal Jumabaevaǵa, ekinshi orın Dilnoza Qurbanbaevaǵa, úshinshi orın Uǵılay Ilyasovaǵa nesip etti.
Bunnan tısqarı marafonda belsene qatnasqan onnan aslam jaslarǵa Húrmet jarlıǵı tapsırıldı.
Qaraqalpaqstan xabar agentligi