15-mart kúni Ájiniyaz atındaǵı Nókis mámleketlik pedagogikalıq institutında belgili alım, filologiya ilimleriniń doktorı, professor, Qaraqalpaqstan Respublikasına miyneti sińgen ilim ǵayratkeri Qurbanbay Járimbetovtıń 70 jıllıq yubileyine baǵıshlanǵan «Keń hám tereń pikirli alım» atamasında respublikalıq ilimiy-teoriyalıq konferenciya bolıp ótti.
Ilajǵa instituttıń professor-oqıtıwshıları, student jasları hám Q.Járimbetov penen birge islesken zamanlasları, shákirtleri hám ǵalaba xabar quralları wákilleri qatnastı.
-Búgingi qaraqalpaq ádebiyattanıw ilimi haqqında gáp barǵanda onıń eń aldıńǵı qatarında miynet etip atırǵanlardıń biri sıpatında Berdaq atındaǵı Qaraqalpaq mámleketlik universitetiniń qaraqalpaq ádebiyatı kafedrası professorı Qurbanbay Járimbetov tilge alınadı. Ilimpaz derlik 40 jılday waqıttan berli qaraqalpaq ádebiyattanıw ilimine xızmet etip kelmekte,-deydi Ájiniyaz atındaǵı Nókis mámleketlik pedagogikalıq institutınıń rektorı, professor Q.Orazımbetov.
Q.Járimbetov diapazonı keń ilimpaz. Ilimiy izertlewleriniń tematikası kóp tarmaqlı, problemalı. Ol qaraqalpaq folklorı, jazba ádebiyattıń tolıq tariyxı, ózbek, qazaq, túrkmen, rus, tatar ádebiyatları haqqında izertlewler júrgizdi. Qaraqalpaq xalqınıń dúnya ádebiyatınıń dúrdanaları menen baylanısta izertledi.
Ol XIX ásir qaraqalpaq lirikasınıń janrlıq ózgesheliklerin, janr teoriyasınıń tiykarın ashıp berdi.
Ilimpazdıń qaraqalpaq ádebiyatı máseleleri boyınsha búgingi kúnge shekem 100 aslam ilimiy maqalaları, ilimiy ocherk hám monografiyaları járiyalanǵan. Onıń ádebiy sın haqqındaǵı maqalaları milliy ádebiyatımızdıń kórkemlik jaqtan jetilisiwine, jámiyette kórkem-estetikalıq kózqaraslarıń rawajlanıwına salmaqlı úles qosıp kelmekte.
Ol «ustaz-shákirt» dástúrin dawam ettirgen ustaz. Onıń ilimiy basshılıǵında 6 kandidatlıq, 2 doktorlıq dissertaciyalar jaqlandı. Onıń elimizge bilimli, ilimli kadrlardı tayarlap bergenine de minekey, yarım ásirge shamalas waqıt bolmaqta.
Tárbiya SEYTNAZAROVA,
Qaraqalpaqstan xabar agentligi xabarshısı