Bıyılǵı Nawrız ulıwmaxalıqlıq bayramı «Áziz watanlaslar, hár kúnińiz Nawrız bolsın!» degen ideyanı ózinde jámlestirip, elimizde usı bayramǵa tayarlıq jumısları baslanıp ketti. Tashkent qalasında bolıp ótetuǵın bayram seyillerine qatnasıw ushın alıp barılıp atırǵan tayarlıq jumısları haqqında Qaraqalpaqstan Respublikası Mádeniyat ministrliginiń mádeniyat mákemeleri xızmetlerin shólkemlestiriw bóliminiń baslıǵı Ádilbek Seytov bılay deydi:

– Bıyılǵı bayram tamashalarınıń ózgesheligi sonda, onı xalıq seyilleri tárizinde ótkeriw rejelestirilmekte. Tashkent qalasına folklor-etnografiyalıq toparları menen ansambller, belgili kórkem óner xızmetkerleri, háwesker qosıqshı hám sazendeler, baqsılar qatnasıwı kútilmekte. Sonday-aq, qara úy aldına qaraqalpaq xalqınıń milliy taǵamlarınan ibarat dasturxan jayıladı. Jergilikli ónermentlerdiń kórgizbesin qoyıw da rejelestirilmekte. Baqsı, jıraw, qıssaxan hám folklorlıq ansambllerdiń teatrlastırılǵan bayram tamashaları qoyıp beriledi. Bayram baǵdarlamasınan jáne qaraqalpaq milliy oyınları – «asıq oyın», «bektas», «arqan tartısıw», «palwanlar gúresi», «qoraz urıstırıw» sıyaqlı sport oyınları da orın alǵan. Sonday-aq, xalqımızdıń milliy úrp-ádet, dástúri esaplanǵan «Qız uzatıw», «Bet ashar», «Besik toyı», «Tusaw kesiw», «Aydar toy» sıyaqlı teatrlastırılǵan baǵdarlamalardı kórsetiw ushın qızǵın tayarlıq kórilmekte.

Maǵlıwmat ushın sonı da atap ótiw kerek, bıyılǵı Nawrız bayramı tamashalarına respublikamızdan qatnasatuǵın wákiller Tashkent qalasındaǵı «Nawrız» baǵı, «ÓzEKSPO» orayı hám «Ashxabad» baǵında bolıp ótetuǵın xalıq seyillerine qatnasıwı rejelestirilgen.

Tárbiya SEYTNAZAROVA,

Qaraqalpaqstan xabar agentligi xabarshısı.