1-mart kúni paytaxtımızdaǵı Ibrayım Yusupov atındaǵı mámleketlik qánigelestirilgen ulıwma bilim beriw mektep-internatında ózbek xalqınıń ardaqlı perzenti, Ózbekstan xalıq shayırı, «Nilufar» hám Javoharlol Neru atındaǵı xalıqaralıq sıylıqtıń laureatı Zulfiya Israylovanıń tuwılǵan kúni múnásibeti menen «Zulfiyanıń poeziya sabaqları» atamasında ádebiy ánjuman ótkerildi.
Oǵan respublikamızdaǵı belgili jazıwshı-shayırlar hám Zulfiya atındaǵı mámleketlik sıylıqtıń laureatları, mektep oqıwshıları, ǵalaba xabar qurallarınıń wákilleri qatnastı.
– Zulfiya ózbek ádebiyatınıń eń iri wákilleriniń biri esaplanadı. Shayırdıń dóretiwshiligi oǵada keń diapozonlı, kórkemlik jaqtan jetilisken, yoshlı shıǵarmalardan ibarat. Onıń qosıqları lirikalıq sezimlerge, ráńbe-ráń súwretlewlerge, ájayıp obrazlarǵa bay. Shayır lirikası rus, ukrain, qazaq, ázerbayjan, túrkmen tillerine awdarılǵan, – deydi filologiya ilimleriniń doktorı Zıyada Bekbergenova. – Shayır Ózbekstan quyashın, onıń sıyqırlı tábiyatı menen miynetkesh adamların, gózzal báhárin, jarqıraǵan jazın, doslıqtı hám tınıshlıqtı, yarǵa bolǵan sap muhabbattı, perzentlerge degen analıq mehirdi jan-táni menen terbene jırlaǵan. Zulfiyanıń qosıqları arqalı xalqımız ruwxıy azıq alıp qoymastan, basqa da tuwısqan xalıqlar menen shet elli doslar da maqtana aladı.
Onda Qaraqalpaqstan Jazıwshılar awqamınıń baslıǵı K.Kárimov, «Qaraqalpaq ádebiyatı» gazetasınıń bas redaktorı G.Annaqlıcheva, «Zulfiya» atındaǵı mámleketlik sıylıqtıń laureatı Q.Begniyazovalar shıǵıp sóylep, shayırdıń dóretiwshilik jolı, onıń insanıylıq pazıyletleri, poeziyasınıń ózine tán tárbiyalıq áhmiyeti haqqında keń túrde atap ótti.
Ádebiy keshe qatnasıwshılarına Ájiniyaz atındaǵı Nókis mámleketlik pedagogikalıq institutınıń «Ziywar» klubı aǵzalarınıń hám mektep-internatınıń shayır dóretiwshiliginen tayarlaǵan mushayrası qoyıp berildi.
Tárbiya SEYTNAZAROVA,
Qaraqalpaqstan xabar agentligi xabarshısı.