Respublikamız paytaxtınıń Tórtkúl gúzarı boyında jaylasqan Qaraqalpaq mámleketlik Dańq muzeyi saplastırılmaqta.

1987-jıldan jumıs baslaǵan muzey Ekinshi jer júzilik urıs jıllarında hám onnan keyingi dáwirde xalıq xojalıǵınıń barlıq tarawlarında pidayı xızmet etken miynet veteranlarınıń, belgili mámleketlik iskerlerdiń ómiri hám miynet jolın sáwlelendiriwshi kórgizbe menen ashılǵan edi. Keyin ala Awǵan jerinde ádiwli wazıypasın ótegen áskerlerdiń, Chernobıl apatshılıǵına qatnasqan watanlaslarımızdıń erliklerin sáwlelendiriwshi materiallar menen tolıqtırıldı. Muzey qorında ǵárezsizlik jıllarında respublika aldınǵılarınıń, Ózbekstan qaharmanlarınıń, Zulfiya atındaǵı hám Nihol mámleketlik sıylıqlarına miyassar bolǵanlardıń, sport jarısları jeńimpazlarınıń, aldınǵı fermerler menen isbilermenlerdiń jetiskenliklerin, respublikamız turmısın sáwlelendiriwshi fotosúwretler, hújjetler, kartinalar, byustler, skulpturalar hám basqa da materiallar jıldan-jılǵa kóbeyip bardı. Ásirese, 2012-jılı muzey xızmetkerleri 3 mıńnan zıyat eksponatlar jıynadı.

Muzeydiń saplastırılıwına baylanıslı onıń qorındaǵı 20 mıń 882 eksponattı qayaqqa jaylastırıw máselelesi sheshilmey atır.

Qorda júdá qımbat bahalı miyraslar bar bolıp, XVI ácirge tiyisli túrkmen xalqınıń moyınǵa taǵatuǵın taǵınshaqları – bir dana sırǵa, bilezik, marjanlı moyınshaq solardan biri. Olar ekspertler tárepinen 16 million AQSh dolları muǵdarında bahalanǵan. Bunnan tısqarı, XVII ásirge tiyisli altın árebek, ónerment Sayatxan Aytimovanıń toqıǵan sáwkelesi, Qaraqalpaqstannıń mámleketlik belgisi – gerbtiń eń dáslepki sızılǵan úlgileri saqlanbaqta.

M.PIRNAZAROVA,

Qaraqalpaqstan xabar agentliginiń xabarshısı.