Qaraqalpaq mámleketlik quwırshaq teatrı ushın bıyılǵı jıl áwmetli baslandı. Jaqında teatrǵa «Damas» avtomobili tapsırıldı hám teatr zalına jaqtılandırıwshı hám dawıs kúsheyttiriwshi úskeneler alıp kelinip ornatıldı.
Balalardıń súyikli dárgayına aylanǵan Quwırshaq teatrı jámááti hár jılı balalarımız ushın ózleriniń biri-birinen ájayıp spektaklleri menen qatnasıp kelmekte.
Usı jılı teatrdıń repertuarınan «Qızıl qalpaqsha» (Sharl Perro), qaraqalpaq xalıq dástanı «Qırq qız» dástanı tiykarında sahnalastırılǵan «Salaqbaydıń múlkleri» (B.Ernazarov), «Batır haqqında ertek» (J.Xojanov) spektaklleri orın alǵan.
– Prezident Shavkat Mirziyoevtıń Ózbekstan dóretiwshi-zıyalılar wákilleri menen ushırasıwındaǵı videoselektorda shıǵıp sóylegeni biz dóretiwshi insanlar ushın úlken juwapkershilik júkledi, – deydi teatr direktorı Maxmud Aytniyazov. Teatr jámááti ótken jıldıń 20-24-noyabr kúnleri Samarqand wálayatında gastrol saparında bolǵan bolsa, usı jıldıń 5-10-mart kúnleri aralıǵında Surxandárya wálayatında bolıwı kútilmekte. Gastrol saparına barıw ushın teatrdıń dóretiwshilik toparı tayarlıq jumısların baslap jibergen.
Mart ayında teatr jámááti balalarǵa Beknazar Ernazarovtıń «Salaqbaydıń múlkleri» spektakliniń premerasın saxnalastırıwdı rejelestirgen.
Tárbiya SEYTNAZAROVA,
Qaraqalpaqstan xabar agentligi xabarshısı