Bizde «Kórkem keńes» jumıs baslamaqta. Endi hár bir qosıqshı klipti súwretke alıp, tayar bolǵan ónimin tikkeley efirge emes, al jańadan jumıs baslap atırǵan «Kórkem keńes»ke kórsetip aladı. Sebebi, denesin ashıq kórsetetuǵın lipaslarda hám qolaysız is-háreketler menen klipke túsiw, efirge shıǵıw qosıqshını licenziyasınan ayıradı.
– Bizde «licenziyadan ayıratuǵınday», mentalitetimizge say emes klipler joq, – deydi «Ózbekkoncert» mámleketlik mákemesi Qaraqalpaqstan Respublikasınıń baslıǵı, Qaraqalpaqstan Respublikasına xızmet kórsetken artist Begis Temirbaev. – Bizde ele klip te onsha kóp emes, qosıqshılarımızdıń kópshilik qosıqlarına klip alınbaǵan. Bul jerde birinshi gezekte xalıqtı, ásirese, jaslardı buzǵınshı ideyalardan qorǵaw, olardı mádeniyatlı, keń talǵamlı, ádep-ikramlı, Watansúyiwshi insanlar etip tárbiyalaw máselesi tur.
Sonı da atap ótiw kerek, jańadan jumıs baslap atırǵan keńes endi tek ǵana klipke emes, qosıqtıń mánisine de ayrıqsha itibar qaratadı.
Móldir Igilikova,
Qaraqalpaqstan xabar agentliginiń xabarshısı