USD 10500.03
EUR 12607.39
RUB 140.7

Juma, 29 Mart

Sayt test rejiminde islep tur. Qolaysızlıqlar ushın keshirim soraymız.

ÓZBEKSTAN RESPUBLIKASÍ PREZIDENTI TÚRKMENSTAN MINISTRLER KABINETI BASLÍǴÍNÍŃ ORÍNBASARÍN QABÍLLADÍ

Ózbekstan Respublikası Prezidenti Shavkat Mirziyoev 1-mart kúni Sawda-ekonomikalıq, ilimiy-texnikalıq hám mádeniy birge islesiw boyınsha Ózbekstan – Túrkmenstan húkimetleraralıq birliktegi komissiyasınıń gezektegi májilisi sheńberinde elimizge kelgen Túrkmenstan Ministrler Kabineti Baslıǵınıń orınbasarı Bayram Annameredovtı qabılladı.

Mámleketimiz basshısı miymandı shın júrekten qutlıqlap, eki mámleket arasındaǵı kóp ásirlik doslıq, jaqsı qońsıshılıq hám óz-ara paydalı birge islesiwge tiykarlanǵan qatnasıqlar izbe-iz rawajlanıp, bekkemlenip atırǵanın tereń qanaatlanıwshılıq penen atap ótti.

Ózbekstan Respublikası Prezidentiniń ótken jılı mart ayındaǵı Túrkmenstanǵa mámleketlik saparı, sonday-aq, eki el basshılarınıń turaqlı sóylesiwleri Ózbekstan-Túrkmenstan birge islesiwin strategiyalıq sheriklik dárejesine kóterip, onı sapa jaǵınan jańa ámeliy mazmun menen bayıtqanı atap ótildi.

Sawda-ekonomikalıq, transport-kommunikaciya, energetika tarawlarındaǵı keń kólemli birge islesiw perspektivaların, ekonomikanıń túrli tarmaqlarında kooperaciya baylanısların bekkemlew máselelerine ayrıqsha itibar qaratıldı.

2017-jılı Ózbekstan menen Túrkmenstan arasındaǵı tovar almasıw kólemi 177 million dollardı quradı. Joqarı qosımsha qunǵa iye ónimlerdi óz-ara jetkerip beriw kórsetkishleri de artıp barmaqta.

Túrkmenabad – Farob jańa avtomobil hám temir jol kópirleriniń iske túsiriliwi hám de júklerdiń temir jol tranzitinde óz-ara shegirmeler usınılıwı júk tasıw kólemin hám eki el tranzit potencialın arttırıwǵa xızmet etip kelmekte.

Shegaraaldı regionlar arasındaǵı baylanıslar, sonday-aq, mádeniy-gumanitarlıq birge islesiw jedellespekte.

Mámleketimiz basshısı erisilgen kelisimlerdiń óz waqtında ámelge asırılıwın támiyinlew, gezektegi joqarı dárejedegi ushırasıwǵa puqta tayarlıq kóriwdiń nátiyjeli mexanizmi sıpatında Húkimetleraralıq birliktegi komissiyanıń jumısına joqarı baha berdi.

Túrkmenstan Ministrler Kabineti Baslıǵınıń orınbasarı Ózbekstan Respublikası Prezidenti Shavkat Mirziyoevqa shın júrekten qabıllaǵanı ushın tereń minnetdarshılıq bildirip, Túrkmenstan Prezidenti Gurbangulı Berdimuhamedovtıń sálemin hám jaqsı tileklerin jetkerdi.

B.Annameredov Túrkmenstan tárepi keń kólemli birge islesiwdi bunnan bılay da rawajlandırıwǵa, eki tuwısqan mámleket arasındaǵı doslıq hám strategiyalıq sheriklik qatnasıqların bekkemlewge tayar ekenin bildirdi.

ÓzA