Qoraqalpog‘iston Respublikasi Maktabgacha va maktab ta’limi vazirligiga qarashli 722 ta umumta’lim maktablarida “Ilmni qadrlang, ilmga intiling!” shiori ostida “So‘nggi qo‘ng‘iroq” tadbirlari o‘tkazildi.
Mana shunday tadbir Nukus shahridagi 46-sonli ayrim fanlar chuqurlashtirib o‘qitiladigan umumta’lim maktabida ham bo‘lib o‘tdi. Dastlab O‘zbekiston va Qoraqalpog‘iston Respublikalari davlat madhiyalari yangradi.
Tadbirda Qoraqalpog‘iston Respublikasi Jo‘qorg‘i Kengesi Raisi A.Orinbayev qadrdon maktabi, mehribon ustozlari bilan xayrlashib, katta hayotga qadam qo‘yayotgan bitiruvchi yoshlarni, ularning ustozlari va ota-onalarini samimiy muborakbod etdi va davlatimiz rahbarining maktab bitiruvchilariga yo‘llagan tabrigini o‘qib eshittirdi.
Tadbirda ta’kidlanganidek, bugungi kunda o‘sib kelayotgan yosh avlodni har tomonlama yetuk inson qilib tarbiyalash, ta’lim tizimini tubdan isloh qilish, ustoz va murabbiylarning mehnatini munosib baholash, yoshlarning bilim olishi uchun barcha sharoitlarni yaratish borasida davlatimiz rahbarining tashabbusi bilan keng ko‘lamli ishlar amalga oshirilmoqda.
Davlatimiz rahbarining umumiy o‘rtata’lim maktablarining bitiruvchi yoshlariga yo‘llagan tabrigini yoshlarimiz katta xursandchilik bilan qarshi oldi. Unda qayd etilganidek, hech shubhasiz, o‘z bilim va iste’dodini Vatanimizga munosib farzand bo‘lishdek maqsadlarga sarflashga bel bog‘lagan yoshlar yangi O‘zbekistonning oltin fondi, bebaho xazinasidir.
– Joriy o‘quv yili bitiruvchilar uchun omadli keldi, – deydi maktab direktorining o‘quv ishlari bo‘yicha o‘rinbosari Almas Purxanov. – Maktabimizning 11 sinfini 200 nafar o‘quvchi bitirayotgan bo‘lsa, shundan 26 nafari muddatidan oldin AQSH, Vengriya va boshqa bir qator xorijiy davlatlarning nufuzli oliy ta’lim muassasalarining mamlakatimizdagi filiallariga qabul qilindi. Shuningdek, 2022-2023 o‘quv yilida 95 nafar o‘quvchi ingliz tilidan xalqaro IELTS sertifikatini olishga muvaffaq bo‘ldi. 8 nafar o‘quvchi oltin, 11 nafar o‘quvchi kumush medal bilan bitirmoqda.
Tadbirda o‘quv yili davomida muvaffaqiyatga erishgan bitiruvchilar, ularning ustozlari bilan ota-onalariga esdalik sovg‘alari topshirildi
Dovud ABIBULLAEV,
Maqsad HABIBULLAEV (surat), O‘zA