Eʼtiborlisi, korxonaga dastlab qariyb 75 million dollar investitsiya yoʻnaltirilgan edi. Yaʼni, sarflangan mablagʻ bir yildayoq oʻzini salkam oqladi.

Yana bir jihati: shuncha paxta tola sifatida sotilganda 11,5 million dollar boʻlardi. Qayta ishlab, tayyor mahsulot sifatida sotilganda 50 million yoki 6 barobar koʻp qoʻshimcha qiymat yaratilgan.

– Mana, klasterlar qanday boʻlishi kerak. Tadbirkorda manfaatdorlik hissi, yangicha dunyoqarash boʻlsa, albatta natija qiladi. Iqtisodiyot ishlasa, ijtimoiy sohalarniyam “tortadi”. Klaster elga manfaat keltiradi, odamlarni ish bilan, daromad bilan taʼminlaydi. Eng katta maqsadimiz mana shu, – dedi Shavkat Mirziyoyev.

Shuningdek, yogʻ-moy zavodi, chorvachilik kompleksi va ozuqa ishlab chiqarish korxonasi tashkil etish rejalashtirilgan.

Shu yerda Buxoro viloyatida pillachilik va qorakoʻlchilik, baliqchilik, tomorqachilikni rivojlantirish, oziq-ovqat mahsulotlari yetishtirish, zamonaviy uzumchilik, limonchilik klasterlarini tashkil etish, sugʻorish tarmoqlarini rekonstruksiya qilish, fermer xoʻjaliklarini yoqilgʻi va mineral oʻgʻitlar bilan taʼminlash tizimini takomillashtirishga oid ishlar haqida maʼlumot berildi.

Xususan, Qorovulbozor tumanida aholi tomorqalaridan samarali foydalanishning namunali tizimini yaratish loyihasiga alohida eʼtibor qaratildi. “Qorovulbozor tomorqa xizmati” MCHJ tomonidan loyiha doirasida 3 mingdan ortiq xonadonda mevali bogʻ tashkil etish, ixcham issiqxonalar qurish koʻzda tutilgan. Bundan tashqari 2 ming 500 dan ortiq xonadonga quyon, parranda, naslli qoramol, shinshilla yetkazib beriladi.

Prezidentimiz tomorqa yerlardan samarali foydalanishga oid rejalarga alohida eʼtibor qaratib, aholiga amaliy koʻmak berish zarurligini, bu oziq-ovqat mahsulotlari moʻl-koʻlligi va arzonligi, bozorlarda narx-navo barqaror boʻlishida muhim ahamiyat kasb etishini qayd etdi.