Aholini sifatli mahsulot va xizmatlar bilan ta’minlash uchun standartlashtirish, metrologiya, sertifikatlashtirish va muvofiqlikni baholash qoidalarini buzganlik uchun javobgarlik kuchaytiriladi. Muvofiqlik sertifikatini berishni asossiz ravishda rad etganlik yoki to‘xtatib turganlik uchun mansabdor shaxslar javobgarlikka tortiladi.
Bu muhim me’yorlar Senat yalpi majlisida ko‘rib chiqilgan “O‘zbekiston Respublikasining Ma’muriy javobgarlik to‘g‘risidagi kodeksiga o‘zgartishlar kiritish haqida”gi qonunda aks etgan.
Muhokama jarayonida Senat raisi Tanzila Norboyeva texnik reglamentlar, standartlashtirish, metrologiya, sertifikatlashtirish va muvofiqlikni baholash qoidalarini buzish alohida jiddiy xavflarni keltirib chiqarishini ta’kidladi. Xususan, oziq-ovqat mahsulotlari va dori vositalari muvofiqligi bo‘yicha sodir etiladigan bunday huquqbuzarliklar nafaqat davlatga iqtisodiy zarar yetkazadi, balki fuqarolar hayoti va sog‘lig‘i uchun jiddiy xavf solishi mumkin. Shu bilan birga, buning uchun belgilangan ma’muriy javobgarlik sodir etilgan qilmishning og‘irlik darajasiga va kelib chiqadigan oqibatlar ko‘lamiga mutanosib emas, bu esa shunday huquqbuzarliklar profilaktikasiga to‘sqinlik qilmoqda. Mazkur qonun sohada qonun buzilishi holatlarining oldini olish bo‘yicha chora-tadbirlarning natijadorligini oshiradi va, eng muhimi, fuqarolar hayoti hamda sog‘lig‘ini muhofaza qilishga xizmat qiladigan zarur huquqiy asos yaratildi.
Qonun texnik jihatdan tartibga solish, standartlashtirish, metrologiya va sertifikatlashtirish, shuningdek, muvofiqlikni baholash qoidalari buzilishlarining oldini olish sohasida sodir etilgan huquqbuzarliklar uchun qo‘llaniladigan ta’sir choralarini yanada tartibga solish maqsadida ishlab chiqilgan.
Qonun bilan Ma’muriy javobgarlik to‘g‘risidagi kodeksga muvofiqlikni baholash organlari tomonidan muvofiqlikni baholash qoidalarini texnik reglamentlar talablariga muvofiq bo‘lmagan mahsulot chiqarilishiga yoki muvofiqlikni baholashni amalga oshirish uchun mahsulotni taqdim etgan jismoniy yoki yuridik shaxsga zarar yetkazilishiga sabab bo‘ladigan tarzda buzganlik uchun javobgarlikni belgilovchi o‘zgartishlar kiritilmoqda.
Bundan tashqari, qonunda muvofiqlik sertifikati berilishi asossiz ravishda rad etilsa, muvofiqlik sertifikatining yoxud muvofiqlik to‘g‘risidagi deklaratsiyaning amal qilishini asossiz ravishda to‘xtatib turgan yoki tugatgan muvofiqlikni baholash organi va uning mansabdor shaxslarining javobgarligi ham nazarda tutilgan.
Xususan, ushbu huquqbuzarlik uchun mansabdor shaxslarga bazaviy hisoblash miqdorining 10 baravaridan 40 baravarigacha miqdorda jarima solish belgilanmoqda.
Agar ma’muriy jazo chorasi qo‘llanilganidan keyin bir yil davomida huquqbuzarlik takror sodir etilgan bo‘lsa, mansabdor shaxslarga bazaviy hisoblash miqdorining 40 baravaridan 80 baravarigacha miqdorda jarima solish ko‘zda tutilmoqda.
Senatorlar ma’qullagan qonun tadbirkorlarga xizmat ko‘rsatuvchi sinov laboratoriyalari va sertifikatlashtirish idoralarining mas’uliyatini oshirish va mahsulotlarning sifat ko‘rsatkichlarini to‘liq baholash orqali aholini sifatli mahsulot va xizmatlar bilan ta’minlashga olib keladi.
Norgul Abduraimova, O‘zA