FOTOREPORTAJ
Nukus shahridagi Qoraqalpog‘iston Respublikasi tarixi va madaniyati davlat muzeyida O‘zbekiston xalq rassomi, Berdaq nomidagi davlat mukofoti sohibi, Qoraqalpog‘iston Respublikasida xizmat ko‘rsatgan san’at arbobi, akademik Jolliboy Izentayevning 80 yillik yubileyi munosabati bilan “Ranglarni sayratgan rassom” nomli ko‘rgazma tashkil etildi.
Ko‘rgazmaning ochilishi munosabati bilan tashkil etilgan tadbirda madaniyat va san’at sohasi xodimlari, o‘quvchi va talaba yoshlar hamda ommaviy axborot vositalari vakillari ishtirok etdi.
Marosimda mahoratli rassom Jolliboy Izentayevning ijodi va hayot yo‘li haqida batafsil ma’lumot berildi.
Ko‘rgazmada rassomning muzey fondlarida, shuningdek, O‘zbekiston Badiiy akademiyasi Qoraqalpog‘iston bo‘limida saqlanayotgan 20 dan ortiq tasviriy san’at asari namoyish etilmoqda.
Ushbu asarlarda Orolbo‘yining o‘ziga xos tabiati, qoraqalpoq xalqi tarixi, milliy an’analari hamda ilm-fan, adabiyot va san’at kabi sohalar rivojiga hissa qo‘shgan shaxslar qiyofasi tasvirlangan.
Maqsad HABIBULLAEV(surat),O‘zA