Соӊғы жыллары Академиялық ескек есиў спорты бойынша топланған бай тәжирийбениӊ нәтийжесинде республикамыз спортшылары Өзбекстан ҳәм халықаралық көлемдеги өткерилетуғын ҳәр қыйлы жарысларда жеӊимпаз атанып, халқымызды шексиз қуўанышқа бөлеп келмекте.
Әсиресе, олар арасында Әбиўбәкир Узақбаев, Ерназар Ҳамийдуллаев, Ислам Мәмбетназаров, Дәмехан Қайыпова, Рәўшан Сапарбаева, Марианна Александрова , Айсара Байлепесова ҳәм Айнура Мәмбетназаровлардыӊ халықаралық көлемдеги жарысларда көрсеткен жетискенликлери, бул спорт түрине қызығыўшылар саныныӊ еле де көбейип, усы спортшылардыӊ ишинен де жаӊа чемпионлардыӊ өсип жетилисиўине тийкар болмақта.
Өзбекстан мәмлекетлик дене тәрбия ҳәм спорт университети Нөкис филиалы Спорт искерлиги ескек есиў топарыныӊ студентлери, Академиялық ескек есиў бойынша Өзбекстан Республикасы сайланды командасы ағзалары Қызжибек Тажибаева ҳәм Гүлнур Отарбаевалар да усындай келешегинен үлкен үмит күттиретуғын жас спортшыларымыздан есапланады.
Олар 2020-жылдыӊ октябрь ҳәм 2021-жылдыӊ март айларында ересеклер арасында Академиялық ескек есиў бойынша өткерилген Өзбекстан чемпионатында 2 адамлық тақ ескек, 4 адамлық жуп ескек, 8 адамлық тақ ескек есиў жарысларында Өзбекстан чемпионы атанып, Академиялық ескек есиў спорты бойынша Өзбекстан спорт шебери дәрежеси талабын орынлаўға миясар болды.
Жақында Өзбекстан Республикасы денетәрбия ҳәм спорт министрлиги тәрепинен бул спортшыларға Академиялық ескек есиў спорты бойынша Өзбекстан спорт шебери дәрежелери гүўалығы берилип, Өзбекстан мәмлекетлик денетәрбия ҳәм спорт университети Нөкис филиалында бул гүўалықты спортшыларға салтанатлы түрде тапсырыў мәресими болып өтти.
Онда филиал директоры Б.Мамбетов ҳәм бир қатар профессор-оқытыўшылар бул спортшы студентлер ҳәм олардыӊ тренерлери менен ата-аналарын ерискен табысы менен қутлықлап, чемпион қызларға Өзбекстан спорт шебери гүўалығы ҳәм филиал жәмәәти тәрепинен таярланған естелик саўғаларын тапсырды.
Спортшы қызларға бүгинги күни Қарақалпақстанға хызмет көрсеткен тренер Муратбай Мамбетназаров ҳәм халықаралық спорт шебери Исламбек Мамбетназаров тренерлик етип келмекте.
Адилбай Оразов,
Қарақалпақстан хабар агентлиги